تحدثت الفنانة صابرين عن فترة حجابها ثم قرار خلع الحجاب موضحة أنها اتخذت القرارين فجأة.

وخلال لقائها في بودكاست 'قصتي' مع محمد قيس قالت صابرين عن قرار ارتداء الحجاب: 'كنت بسمع درس دين في التليفزيون كنت قاعدة جنب ماما وكان أخويا بيزن عليا ويقولي افرضي ماشية بالعربية وعملتي حادثة وموتي، سمعت درس الدين وابتديت انسحب انسحب، كان جنبي طرحة الصلاة لبستها وقلت 'أشهد أن لا إله إلا الله وأن محمد رسول الله' ماما أنا اتحجبت ، ماما قالتلي مقدرش أتكلم، قرار صعب أن أي حد يقولك مع أو ضد، أنا كنت في عز نجوميتي، البني آدم مع ربنا طول الوقت مش بالطرحة دي مجرد حاجات خارجية الداخلي أهم، كنت حاسه براحة نفسية في المرحلة دي وهدوء يمكن علشان هبعد وهاخد نفس لأني كنت بجري كتير أنا بدأت و أنا عندي 4 سنين'.

وتابعت لتحكي عن قرارها فيما بعد بخلع الحجاب: 'كان بقالي سنتين بقولهم أنا عايزة أفك الحجاب أنا حاسه إني دايسه على الإنسانة والفنانة، قعدت أقول بعمل أدوار عظيمة وباخد جوايز حلوة أوي والناس بتحتفي بيا وفي الآخر خالص السوشيال ميديا تكتب 'باروكة راحت باروكة جات' يمكن كان خطأ الباروكة، أنا حسيت وأنا بتفرج على نفسي كنت بعمل مسلسل كوميدي ولقيت مكتوب صابرين بتعمل مسلسل كوميدي بباروكه استفزيت، ابتديت أبقى في سن بطلع أم علي ربيع، حسيت أن عيشي لحظاتك العمر قصير استمتعي متبقيش كدابة خصوصا مع نفسك، ليه طول القوت ابقى كدابة مع نفسي وأقول لأ والاقي ناس تهاجمني ليه المفروض افرح بنجاحي ليه أرد على ناس ونتخانق لحد دلوقتي لما بتنزلي أي صورة الناس تكتب هي مش دي كانت محجبة روحي بقى جهنم وبئس المصير، أحكام قوية جدا كأنهم أخدوا صكوك مين هيدخل الجنة ومين هيدخل النار'.

وأضافت: 'أنا كنت بقول لكل اللي حواليا أنا هفك الحجاب كنت عايزة حد يقويني ويقف في ضهري، أكتر موقف لن أنساه موقف مامتي أنا نزلت رحت عند الكوافير صبغت شعري وصورت صورة ونزلتها على فيسبوك من غير ما أي حد يعرف وفجأة حسيت الكرة الأرضية اتهزت بيا، ابني قالي ليه كدا يا ماما إحنا خايفين عليكي من الحرب اللي هتقوم عليكي على السوشيال ميديا، أخويا اتضايق جدا وكتب على جروب عائلي على واتساب كلام جامد، أنا خرجت من الجروب ودي كانت أول مرة أعمل موقف كده أني خلاص مش هسمع غير نفسي لأني كنت توهت مني طول الوقت خايفة حاسه الناس لما تشوفني هتقولي يا أم باروكة، أنا جامدة أنا قوية بإيماني بربي ربنا مش الناس دي ربنا أكرم من كده بكتير، جالي قوة نفسية رهيبة أقفي واجمدي، ماما دخلت على الجروب عملت فويس وردت على الكل، أخويا بالليل جيه وحضني وقالي دي حاجة بتاعتك بينك وبين ربنا ولازم تبقي عارفة إننا بنحبك ونحترمك ومش عايزين حد يتكلم عليكي نص كلمة أنا بفتخر بيكي طول عمري ولبستي أو قلعتي الحجاب'.

وكشفت صابرين عن حالتها في هذه الفترة التي اتخذت فيها قرار خلع الحجاب: 'أنا كنت في مرحلة أني نسيت إني امرأة في اللحظة اللي خلعت فيها الحجاب كنت متقبلة كل حاجة أخويا لم عايز يتبرى مني أوكي جوزي لو عايز يطلقني أوكي'.

وأكدت صابرين أنها لم تشعر أن إيمانها تغير بعد خلع الحجاب وقالت: 'الأخلاقيات مش بتتجزأ، من جوايا جالي حته إني متحجبة وإني بمثل حاجات محترمة فساعات كنت بفوت صلاة أو مش بعمل الورد بتاعي أو مش ببقى خايفة حاسه بأمان، لما فكيت بقيت بخاف أكتر وإزدادت طاعتي أكتر وحافظت على صلواتي أكتر ودي حاجة المفروض مقولهاش بس حقيقي دا اللي حصل، كنت حاسه أن ساعات بتحس بغرور أنا لسه راجعة من الحج أو العمرة كنت حاسه بالأمان إني عاملة كل حاجة مظبوطة، دلوقتي بقيت طيب لو موتي النفس اللوامة، النفس اللوامة كانت هادية أثناء الحجاب لما فكيت زادت أوي سواء في الكلام مع الناس ومعاملة الآخرين بحس أن ربنا طول الوقت قدامي زاد إلتزامي وقوة إيماني'.

يشار إلى أن آخر أعمال صابرين كان فيلم 'الملحد'.

فيلم 'الملحد' بطولة أحمد حاتم، نجلاء بدر، شيرين رضا، محمود حميدة، صابرين، وتارا عماد، ومن تأليف الكاتب إبراهيم عيسى، وإخراج محمد جمال العدل.

وتليفزيونيا كان آخر أعمالها مسلسل 'إقامة جبرية'.

مسلسل 'إقامة جبرية' من بطولة صابرين، هنا الزاهد، ومحمد الشرنوبي، ثراء جبيل، عايدة رياض، محمود البزاوي، ولطيفة التركي. تأليف أحمد عادل، وإخراج أحمد سمير فرج.