حل المخرج محمود كريم ضيفا على برنامج 'لمن يهمه الفن'، تقديم أميرة نور على 'نغم إف إم'، حيث تحدث عن كواليس فيلم 'ريد فلاج' الذي تم طرحه مؤخرا في السينمات.

وقال محمود كريم: 'فيلم (ريد فلاج) توعية للناس عن العلاقات، وكيفية اختيار شريك الحياة وفيه من روح فيلم (الزوجة رقم 13). ومصطلح ريد فلاج مصطلح دارج بين الشباب، عشان كده تم اختياره عنوان للفيلم، لأنه بيخاطب الشباب'.

وأضاف: 'فكرة توكيل الزواج شدتني لما قريت ورق فيلم (ريد فلاج)، وكنت عايز أفهم أكتر عن الفكرة واشتغلنا عليها وناقشناها بطريقة حديثة'.

أوضح محمود كريم رأيه في التصنيف المناسب للعمل قائلا: 'مش بعتبر فيلم (ريد فلاج) كوميدي فقط، وشايفه رومانسي كوميدي لأن الكوميديا فيه مش الهدف الأساسي، والفيلم رسالته مهمة جدا'.

وتابع: 'كان اللي يهمني إني أطلع من فيلم (ريد فلاج) بقضية وشكل جديد، وأحمد حاتم وجميلة عوض عملوا مباراة فنية هايلة'.

كما تحدث محمود كريم عن نشأته بالقرب من كواليس صناعة الأعمال الفنية قائلا: 'والدي المنتج الفني محمد كريم رفعت اشتغل في صناعة الفن زمان، وعمل أعمال قديمة زي (هو وهي) و(دموع في عيون وقحة) وده خلاني قريب من الوسط الفني وعشقت الفن بسببه'.

وأكمل: 'أول مرة دخلت استوديو قعدت أراقب الأستاذ محمد راضي، وعجبتني أوي فكرة الإخراج ومن هنا بدأ مشواري من سن أولى إعدادي. اجتهدت جدا لما كنت مخرج منفذ، وأول يوم إخراج ليا كان في فيلم (ياباني أصلي) ونوعيته كوميديا سوداء، وبعتبره من أعز الأعمال لقلبي لأني تعبت فيه جدا. الكوميديا صعبة جدا لأنها السهل الممتنع وممكن تقلب بسخافة، ومحتاجة سينس خطير جدا '.

وحول تصنيفه كمخرج كوميدي قال: 'كل فيلم كوميدي أخرجته كان مختلف عن التاني، وكانت في مراحل مختلفة في حياتي، والناس صنفوني إني مخرج كوميدي برغم اختلاف نوع الكوميديا اللي أخرجتها'.

كما تطرح حوار المخرج محمود كريم إلى مواضيع أخرى، ونستعرض فيما يلي تصريحاته للبرنامج:

- بحب رامز جلال على المستوى الشخصي جدا، وهو شخص دمه خفيف، وفي الشغل مجتهد جدا وبيهتم بالتفاصيل، واتبسطت في تجربتي معاه في فيلم (رغدة متوحشة) و (أحمد نوتردام).

- فيلم (سبع البرمبة) استمتعت فيه جدا لأني اتعاملت فيه مع نجوم كتيرة زي السقا وأمير كرارة وياسر جلال.

- شغال حاليا على أفكار كتيرة، وحلمي إني أعمل أفلام كويسة من غير ضغوط، ونفسي أشتغل في الرعب والجريمة ومش حابب أتصنف كمخرج كوميدي.

- نفسي أشتغل مع فنانين كبار زي كريم عبد العزيز وأحمد السقا.

- عملت حلقة لونجا في مسلسل (خارج السيطرة)، واستمتعت فيها جدا برغم إنها أخدت أسبوع فقط، بس حبيتها جدا ونفسي أكررها في السينما.

- اشتغلت في رمضان اللي فات دراما، ومش هنكر إني بحب شغل الأفلام أكتر لأنها باقية .

- اشتغلت مع الفنانة الجميلة ليلى علوي 3 أفلام (ماما حامل) و(شوجر دادي) و(جوازة توكسيك)، واستمتعت جدا بتجاربي معاها .

- زوجتي ياسمين مصممة أزياء واشتغلت معاها في فيلمين وهي موهوبة جدا.

يذكر أن فيلم 'ريد فلاج' بطولة أحمد حاتم وجميلة عوض وشريف منير ونسرين أمين وانتصار وسيف زهران، فكرة كيرو أيمن، وعدد كبير من ضيوف الشرف والفنانين الشباب، من إنتاج محمود عبدالله، أحمد الجنايني، محمد رشيدي، وامباير موفيز، ومن تأليف أحمد محيي، وإخراج محمود كريم.