كشفت الفنانة داليا مصطفى سبب رفضها فيلم 'الساحر' مع النجم محمود عبد العزيز الذي أنتج عام 2001.

وحكت داليا مصطفى خلال لقائها في برنامج 'حبر سري' مع أسما إبراهيم: 'رفضت فيلم 'الساحر' مع الفنان محمود عبد العزيز والمخرج رضوان الكاشف، لما قعدت مع الأستاذ رضوان نقرأ السيناريو كنت كل شوية أقوله دي مش هقدر أعملها فيشيلها المشهد الفلاني دا بلاش شيلت مشاهد كتير'.

وتابعت داليا مصطفى: 'جيت عند مشهد البوسة فقالي أستاذ رضوان أنا بسألك دا ينفع يتشال فقلت له الصراحة لأ، لأنها كانت حاجة درامية وأساسية وقائم عليها حاجات كتير جدا في الفيلم فقلت له لأ متتشالش، قالي هنعمل إيه؟ قلت له لأ مش هقدر أعمل الدور، معتقدش حتى لو جالي الدور دلوقتي أقدر أعمله، ومندمتش'.

وأكملت داليا مصطفى: 'أنا في الفترة دي جالي 3 أفلام كلهم نفس النوعية، منهم 'مذكرات مراهقة' كانوا 3 أفلام من أهم أفلام الفترة دي، ومش ندمانة على أني معملتهومش، أنا زعلانه أنه اتقال عليها في الفترة دي إني برفض الأعمال، أنا برفض أنواع معينة'.

من ناحية أخرى تشارك داليا مصطفى في بطولة مسلسل 'روج أسود'، مع مجموعة من النجوم، وتدور أحداثه حول 5 قصص حقيقية عن المطلقات ومعاناتهن في الحياة.

مسلسل 'روج أسود' من تأليف أيمن سليم، إخراج محمد عبد الرحمن حماقي، وتشارك في بطولته رانيا يوسف، مي سليم، داليا مصطفى، لقاء الخميس، وفرح الزاهد.