كشف الفنان إياد نصار عن أصعب مشاهد مسلسل 'صحاب الأرض' الذي خاض به السباق الرمضاني الماضي.

وقال إياد نصار خلال لقائه مع الإعلامي عمرو الليثي في برنامج 'واحد من الناس' المذاع عبر قناة الحياة: 'في لحظات مهمة جدا في 'صحاب الأرض'. لحظة كيس الدقيق، اللحظات اللي استخبى فيها، كلمة 'وين نروح' وهو طالع من أوضة العمليات اللي اتقصفت. قعدت أفكر لازم أقولها بكل أبعادها. إحنا كشعب وين نروح؟ والرد كان في آخر المسلسل أنا فاضل، ولو بتسألوا هل في احتمالية للتهجير بيقول لك لأ'.

وتحدث إياد نصار عن المشهد الذي أبكاه خلال تصويره في المسلسل قائلا: 'في مشهد استخراج ابن أخويا في 'صحاب الأرض' من تحت الأنقاض أنا انهرت بعد ما بيتر ميمي قال (كات)، لأنها كانت لحظة مفترض بكلم 'يونس' ومن الحاجات اللي سمعناها إنهم بيندهوا ولو حد رد الصوت يفضلوا يكلموه ويطمنوه لغاية ما يطلعوه، يعني بيخلوه يمسك في الحياة أكتر... كان لازم أوصل للإحساس ده'.

وأكد إياد نصار على أهمية مشاهد دفن الموتى وصلاة الجنازة في مسلسل 'صحاب الأرض' قائلا: 'مشاهد دفن الموتى في 'صحاب الأرض' مهمة جدا وكانت لها رمزيتها وحقيقية إحنا مش بنعمل شعر. في حكايات سمعناها واحد شايل ابنه وماشي لغاية ما لقى مكان يعرف يدفنه وحط أي علامة عشان يعرف قبر ابنه على جنب الطريق. ده إصرار على فكرة إن لي مكان هنا طالما لي موتى'.

وردا على سؤال هل لا يزال يحتفظ بفكرة العودة إلى فلسطين قال إياد نصار: 'فكرة العودة موجودة عندي طبعا وأورثها لأولادي. مسلسل زي 'صحاب الأرض' ده الكلام اللي تسيبه للأجيال إنك لازم تكون موجود. مينفعش تسيب أولادك لسردية تلعب في دماغهم أو تغير انتماءاتهم أو أولادي ينسوا إنهم من أصول فلسطينية'.

يضم مسلسل 'صحاب الأرض' مجموعة كبيرة من أبرز الفنانين ومنهم إياد نصار ومنة شلبى وكامل الباشا وعصام السقا وتارا عبود، ريم رأفت، آدم البكري، سارة يوسف، والفنان الأردني يزن عيد، وعدد آخر من الفنانين، وهو من تأليف عمار صبرى، وإخراج بيتر ميمي.