أثار مغني المهرجانات مسلم قلق جمهوره بعد إعلانه عن تعرضه لأزمة صحية غامضة لم يتمكن الأطباء من تشخيصها، ما دفعه للتعبير عن معاناته عبر حسابه الرسمي على منصة 'إنستغرام'، موجهاً رسالة مؤثرة ومشحونة بالمشاعر إلى جمهوره.

مسلم يشكو من تدهور حالته الصحية

كتب مسلم عبر خاصية 'ستوري' بحسابه على 'إنستغرام': مكنتش متخيل إن فيه حد يأذي حد بالطريقة دي.

وأوضح أنه خضع لعدة فحوص طبية دون جدوى، قائلاً: بجد حسبي الله ونعم الوكيل، أنا حقيقي كل يوم في مستشفى شكل.. وعملت رسم قلب وعملت كل حاجة وميظهرش حاجة في الكشف، طب من إيه؟

مسلم: الطب نفسه مش عارف يشخص حالتي

تابع مسلم منشوره بكلمات تعكس يأسه وألمه النفسي، قائلاً: الطب نفسه مش عارف يشخص حالتي، يا رب أنت أقوى من أي حاجة، وأنت عارف إني إنسان نضيف ومليش في الأذية ولا أعرف العدوان.

وأضاف: اقف جنبي، وحق لا إله إلا الله، لأقف جمب أي حد يحتاج حاجة مني، وأكون في المقدرة عليها هعملها يا رب.

اتهامات غير مباشرة للنقابة

قبل أيام، كان مسلم أعلن عن تعرضه لانسداد في أحد شرايين القلب، موجهاً اتهاماً غير مباشر لنقيب المهن الموسيقية مصطفى كامل، بكونه مسؤولاً عن تدهور حالته الصحية والنفسية، قائلاً: حسبي الله ونعم الوكيل، والله دا ما يرضي ربنا، الصبح يتسد ليا شريان في القلب، وبالليل أنا ومراتي بنموت.

كما أضاف بحرقة: أنا حرفيًا شوفت الموت الصبح، يا رب حسبي الله ونعم الوكيل في كل واحد سبب في مرضنا، كدا محدش همه زعل الإنسان ولا بينام بالليل عامل إزاي، بسبب ناس ظلمة كتير، وإنتوا عارفين كويس هما مين.

اعتذار علني للنقابة والنقيب مصطفى كامل

لاحقاً، خرج مسلم بفيديو اعتذار وجهه لنقيب الموسيقيين مصطفى كامل وأعضاء النقابة، مبرراً انفعاله بمروره بظروف صعبة قائلاً: الفيديو ده بقدم فيه اعتذاري للنقابة والنقيب مصطفى كامل، ولو كنت دعيت عليك أو حاجة ده بسبب إني شاب وحدي، وكنت تعبان وملقتش حد يقف جمبي في تعبي، وبيتي اتخرب في الفترة اللي اتوقفت فيها عن الغناء.

واختتم مسلم اعتذاره قائلاً: كان أقل طموحي إني أشتغل زي زمايلي، بعتذر لك وأنا زي ابنك، وأنا قد اعتذاري حتى لو مش هشتغل، ومشتمش حد، أنا قولت حسبي الله ونعم الوكيل بس، وإنتو بيتي وأهلي، وأستاذ مصطفى من وقت ما مسك النقابة وهي في تطور.