في أول تعليق لها على الأزمة التي تمرّ بها ابنتها شام بعد إغلاق عيادتها، خرجت الفنانة السورية أصالة نصري عن صمتها برسالة مؤثرة شاركتها مع متابعيها عبر حسابها، وعبّرت أصالة عن حجم الألم الذي تعيشه الأسرة، مؤكدة أن ما تمر به شام هو امتحان صعب لكنه سيمر، مشيرة إلى أنها ابنتها 'الملاك' والنور الذي يضيء حياة الآلاف، وكتبت في منشور لها مرفقة مجموعة من الصور لشام : كتير مرّينا أنا والولاد بإمتحانات صعبه وأيام أصعب، وبكلّ مرّه ماكان عندي شكّ بعدل رب العالمين.

وكانت حياتي من بداياتي لليوم عباره عن جمله بتقول: (الناس الأشرار قلال بس بيوجعوا، ولازم دائماً مهما كترت الجروح والصدمات نقارنهم بالكتار ونتذكرهم لنعرف إنهم مهما كتروا قلال). ونحنا اليوم بإمتحان من هالإمتحانات وبيمرّ ورح يمرّ.

وشام هيي النّور اللي مضوّي حياة آلاف البشر، أنا منهم … بنتي الملاك رح تبقى ملاك، ومارح يوجعها أكتر من وقته الوجع، ودواها نحنا أهلها، اللي كان إلنا سعادة تكون شام منّا وفينا. شام حبيبة الحياة وأهلها، طاقة العلم والتهذيب والعطاء، عم تمرق منّ شارع ضيّق بهالحياة اللي فيها شوارع مضوايه بأهل، أنتوا منهم يا طيبين، يا أهلنا وأصحابنا وناسنا.

وهالشارع مهما ضاق رح يخلص، ورح تطلع منّه منّ غير ما تشوف وراها أو حتّى تتذكّر شو كان هالمرور صعب. ومافي مرور إلًا وبتصادفه عثرات، والعثرات بتكبر وبتكتر لمّا هالمرور منّ رحلة هالحياة بيكون مو عادي، ونجاح شام مو عادي، ومرورها بهالحياة أكيد حيصادفه عثرات وأكيد حيكون فيه صعوبه حتّى بتحقيق السهل.

كلّ القلوب الحلوه، يا حلوة الحلوات، معك وبتدعمك، وقلبي قبل إيدي وروحي ملكك وتحت أمرك. وبدعي لك وبتوسّل ربّي برحمته يحتويكي، وبتصير أشياء بتكون عكس شو توقعنا، وبتصدمنا لتقوّينا وترجّعنا أحلى وأقوى وأحنّ وأهدى، وشامي الحلوه، حلوه وهاديه وإنسانه، وكلّ طاقات الفرح والفرج رح تتهيّأ لها .