كشف الرابر عفروتو عن أنه لعب كرة القدم في صغره بشكل احترافي، لكنه لم يكمل مسيرته في هذه اللعبة، بعد انجذابه لعالم الراب.

وقال عفروتو خلال حواره مع الإعلامي أنس بوخش في برنامج ABtalks Music: 'في طفولتي أخويا الكبير كان لعيب أوي وأشطر مني في الكورة لحد دلوقتي وأهلي مبسوطين منه، لما كبرت شوية أهلي فضلوا يقنعوني ألعب كورة مع أخويا، لكن أنا مكنتش حابب'.

وأضاف عفروتو: 'كان عندي موهبة ومع الوقت بقيت أجمد واحد في الفرقة في مدرسة الكورة، وشافني مدرب من نادي الاتحاد السكندري وقال لازم تمضي في النادي، وابتديت ألعب كورة في سن صغير'.

وتابع: 'لما بدأت أغني راب كنت في الأواخر مع الكورة وقربت أبطل، المشوار عندنا صعب شوية، وبعد ما غنيت درست حقوق واتشهرت وأنا في الدراسة'.

واختتم عفروتو قائلا: 'كنت بحب الكورة وأنا في النادي، ولما احترفت الراب والمزيكا حسيت إن شغلي في الكورة كان بربع شغف، لكن شغفي في المزيكا كان أكتر من 100%'.