أكد الفنان عمرو سعد أنه يهتم كثيرا بتحويل رواية 'أولاد حارتنا' للأديب العالمي نجيب محفوظ لعمل يشاهده الأجيال الجديدة حتى وإن لم يظهر فيه كممثل واكتفى بدوره كمنتج فقط.

وقال عمرو سعد في لقاء مع ET بالعربي: 'أنا من أكتر من 3 سنين حصلت على حقوق لأعمال كتير للعظيم الرائع نجيب محفوظ وقلت أن دا واجبنا كمصريين إننا نعيد تقديم هذا الرجل العالمي اللي شرف لينا والعرب الجايزة اللي أخدها ونقدم للناس اللي طالعة والأجيال الجديدة حاجة من أعماله'.

وتابع عمرو سعد: ' مكنش هدفي وقتها أمثل هدفي إني مصري ومعتز بمصريتي وبالراجل دا وكنت عايز أفك الالتباس على الرواية دي'أولاد حارتنا' لأن ظلمها واشارك في إنتاجها وأنا بعلن أن لو ربنا يسر هيكون فيها كوكبة من نجوم مصر والوطن العربي أنا غير مهتم إني أمثل فيها أكتر من إني أكون منتج ومش مهم تحقق فلوس قد ما تحقق نجاح وتواجد وقيمة'.

وأكمل عمرو سعد: 'أخدت حقوق 3 أعمال أخرى من أعمال نجيب محفوظ ومجموعة قصص قصيرة ودفعت فلوس كتير ومش هاممني إني أعوض الفلوس قد ما تطلع الأعمال إحنا في انتظار الرقابة والمخرج محمد ياسين هو المسئول عن إخراج الرواية'.

على جانب آخر، كشف عمرو سعد تفاصيل عودة تعاونه مع المخرج محمد سامي في رمضان 2027، مؤكدا أنه لا وجود لخلافات بينهما.

وقال عمرو سعد: 'لسه الموضوع مقدرش أعلن عنه بالكامل دلوقتي أنا مهتم بالسينما وعندي 3 أفلام أهمهم اللي انتهيت من تصويره 'الغربان' غالبا هيتعرض في ديسمبر ودا فيلم كبير والفيلمين التانيين، بس المسلسل 'لرمضان 2027 أنا بعتبره تكليف ودي أقل حاجة أقدمها لبلدي، مع المخرج محمد سامي، إحنا مش متخانقين متصالحين على طول محمد سامي طول الوقت حتى لو في خلاف في وجهات النظر طول الوقت بيبقى معايا على التليفون مخرج كبير ورائع وناجح وأخويا وصديقي وبينا ذكريات تمتد لـ10 أو 12 سنة مفيش خلافات بينا'.