حل السيناريست والمخرج خالد دياب ضيفا على برنامج 'بحب السيما'، تقديم شريف نور الدين على 'ميجا إف إم'، حيث تحدث عن استقبال الجمهور والنقاد لفيلم 'برشامة'

وقال خالد دياب في تصريحاته للبرنامج: 'سعيد جدا إن فيلم 'برشامة' عجب الجمهور والنقاد، وعمل حالة فنية أجمع عليها الجميع، والنقاد قالوا عنه إنه فيلم أولا، وبعد كده صنفوه إنه كوميدي، وده شيء أسعدني لأنه معناه إن الفيلم مش للضحك فقط'.

وأضاف: 'الفرق بين الفيلم والمسلسل إن الفيلم بيبقى فيه مواقع تصوير كتير، وفيه تنوع بصري، غير المسلسل بيبقى متصور فى لوكيشن داخلى، لكن 'برشامة' كان فيلم مختلف'.

وتابع: 'صاحب الفكرة الحقيقية لفيلم 'برشامة' هو المؤلف أحمد الزغبي، وهو مؤلف هايل وكان قايلى على الفكرة من فترة كبيرة، والحمد الله قدرنا نشتغل عليها بعد موافقة هشام ماجد وتحمس المنتج أحمد دسوقى إنتاجيا، لأنه كان مؤمن بالمشروع جدا'.

وأشاد خالد دياب بتعاونه مع الفنان هشام ماجد قائلا: 'الفنان هشام ماجد أنا بسميه 'المايسترو'، وفى فيلم 'برشامة' عمل دور فلاح وهو شكله ألماني أصلا، بس مع اللبس واللهجة والدقن وتقمصه للشخصية بقى فلاح أراري!'

وأكمل: 'أتمنى اشتغل مرة تانية مع فريق عمل 'برشامة'، مرة واتنين وتلاتة، رغم إن ده صعب وفكرة إنى أعمل جزء تانى من عمل لازم يبقى عندى أفكار أقوى من الجزء الأولانى'.

كما أشاد خالد دياب بفيلم 'إيجي بيست' قائلا: 'اتفرجت على فيلم 'إيجي بيست' وشايفه فيلم رائع ويستحق المشاهدة، وكل أبطال العمل عملوا شغل هايل فى الفيلم ده، وموسم عيد الفطر السنة دى حلو جدا'.

واختتم خالد دياب حديثه قائلا: 'لو هقول حاجة عن فيلم 'برشامة' للمستمعين، هقول إنه فيلم مختلف بصريا، وفيه تجميعة نجوم هايلين، والأبطال بتوعه صعب يتجمعوا تانى مع بعض بسهولة'.