حكت الفنانة ميسرة تفاصيل عملية تجميل فاشلة خضعت لها لتحذر الجمهور من أخطار هذه العمليات.

وقالت ميسرة خلال لقاء ببرنامح 'ست ستات': 'عملت حقن دهون في الوش كانت الحقنة اللي داخلة مش معقمة صح كان فيها بكتيريا منتشرة في المستشفيات بكتيريا بتعيش على الوش وفي الأسنان لكن لو دخلت واتقفل عليها بتعمل حالات تسمم'.

وتابعت ميسرة: 'الدكتور لما جيه يعالجني قالي أن لازم ننزل اللي حقناه ووشي هيرجع زي الأول ومش هيعمل خياطة لكن كل دا أنا رفضته، رحت لدكتور تاني اسمه أكبر من الأولاني ووريته التحاليل قالي أني مش محتاجة أعمل كده وأنا سمعت كلامه، وجالي تسمم في الجسم كله واتنقلت للمستشفى قعدت 10 أيام بينضفوا الجسم وبعدها قعدت شهرين أو تلاتة بتعالج'.

وأكملت ميسرة: 'موضوع التجميل دا هوس للبنات والرجالة لكن أنتي تعملي اللي انتي محتاجاه إذا أنتي مش محتاجه متتفلسفيش لأنها هتنقلب عكسي عليكي، إحنا محدش فينا هيبطل تجميل لكن متعمليش غير اللي محتاجه وخليكي بسيطة واسألي جدا واعرفي مش لازم يكون اسم الدكتور كبير وبلاش مراكز التجميل اللي بتدي حقن لازم يكون الدكتور عارف ومتخصص في الحاجة اللي هتعمليها'.