فيديو - ريم مصطفى تصرخ في "رامز إيلون مصر": يا حيوان .. إنت عارف إنك جبان

دخلت الفنانة ريم مصطفى في نوبة صراخ خلال حلولها ضيفة على حلقة اليوم من برنامج 'رامز إيلون مصر' المذاع عبر قناة MBC مصر.

وانفعلت ريم مصطفى لحظة كشف الفنان رامز جلال عن نفسه وصرخت قائلة: 'يا حيوان إنت عارف إنك جبان'.

وخلال فقرة السرير الدوار والتعهد قالت ريم مصطفى: 'مش هنزل صور بظهري على إنستجرام تاني وهقفل الحساب، وأنا بحب روبي جدا وبموت فيها'.

وتابعت ريم مصطفى: 'فيلم بنات رزق إشاعة، ونفسي أمثل مع كريم عبد العزيز'.

وكان رامز جلال استقبل ريم مصطفى بمقدمة ساخرة قال فيها: 'مزة النهاردة تستحق عن جدارة لقب نجمة الإشاعات، ياما إتقال عليها حاجات، زي مثلا خرابة بيوت وبتخطف الرجالة من الستات'.

وأضاف رامز: 'البت خست وعمالة تحلو، وبتاكل من فنانات كتير الجو، هنعرف النهاردة دي الحقن الجديدة ولا عملية تكميم، أصل العود اللي وصلت له مستحيل يكون رجيم، معانا فاتنة سن اليأس ذات الجمال النرويجي'.

وسخر رامز من إطلالة ريم مصطفى بعد وصولها للبرنامج قائلا: 'انزلي يا وزة الفن المدملك، إيه الشعر ده يا عروسة البحر، وملاحظ إن البودي قامط أوي، إنت لابساه ولا لازقاه؟'

وتابع: 'الوسط ده مش طبيعي، فجأة بقت سلمى حايك، الوسط ده يا إما نحت يا إما كورسيه، ودي مش مركبة رموش مركبة مقشات، وجزمة دي ولا رجيلين بطريق، ودي مش بتاخد بوتوكس دي بتعمل كمادات بوتوكس'.

تدور فكرة 'رامز إيلون مصر' حول استدراج ضحية المقلب إلى المشاركة في لجنة تحكيم برنامج اكتشاف المواهب 'جولدن تالنت'، إلى جانب النجمة نوال الزغبي، ونجم نادي الاتحاد والمنتخب السعودي محمد نور، بالإضافة إلى رامز جلال، والمذيعة بسنت شمس، التي تلعب دور مقدمة برنامج المواهب.

ويبدأ المقلب فعليا عندما تتم دعوة الضيف أو الضيفة إلى المشاركة في اختبار اختراع طبي لأحد متسابقي المواهب، وهو 'روبوت' يعمل بالذكاء الاصطناعي، يمكنه إجراء فحص طبي شامل للمريض خلال 10 دقائق.

لكن قبل ذلك، يكون رامز جلال قد تم استبداله بشخص آخر خلال فقرة إحدى المواهب، ليعود للظهور على المسرح بشخصية الروبوت 'زنجباري'، ويبدأ عندها المقلب واختبار قوة تحمل الضيف المربوط في سرير دوار، ويستكمل رامز المقلب بعد الكشف عند نفسه.

وتضم قائمة ضيوف برنامج 'رامز إيلون مصر' عددا كبيرا من نجوم الفن والرياضة والإعلام، ومنهم فيفي عبده، وأحمد فهمي، ومحمد رجب، ونور النبوي، وأحمد العوضي، ومصطفى أبو سريع، وحسام حبيب، ومحمد عبد الرحمن، ومصطفى غريب، ونور إيهاب، وحاتم صلاح، ومن لاعبي كرة القدم إمام عاشور، وأشرف بن شرقي، وناصر منسي، ودونجا، وطاهر محمد طاهر.