خاص هدى الإتربي لـ(في الفن): نفسي أعمل حاجة تعبر عن جيلنا و"الكيميا" قربت بيني وبين "السبتي" ولو اتعمل جزء 3 من "العتاولة" هوافق طبعا وحضّرت لشخصية "دينا" في أمريكا

بالأرقام والحسابات يمكن جدا اعتبارها صاحبة أطول تريند عمرا امتد من رمضان 2024 إلى رمضان 2025 بدورها في مسلسل 'العتاولة'، لفتت الأنظار وأحبها الجمهور وأطلق عليها العديد من الألقاب، واقترن اسمها بأغنية 'قنبلة الجيل' فأصبح أحد ألقابها وأقربهم إلى قلبها.

التقينا بالفنانة هدى الإتربي وتحدثت عن دورها في 'العتاولة' ودورها ورسالته وصعوباته وأحلامها لمشوارها الفني بعد دور 'دينا'.

مقلقتيش من المشاركة في جزء ثاني من 'العتاولة' ممكن يأثر على نجاح الجزء الأول؟

بالعكس، وجودي في الجزء الثاني من 'العتاولة' كان مرتبط بإني عايزه أكمل نجاح الجزء الأول، وأكمل دور 'دينا' خصوصا الحمد لله كان ربنا أكرمني بنجاح كبير فيه، وكان عامل صدى كويس قوي في الشارع، فكان بالنسبه ليا ده مش جزء ثاني على قد ما هو تكمله للنجاح.

إيه اتغير في شخصية 'دينا' في الجزء التاني؟

'دينا' في الجزء الثاني بقى ليها خط درامي قدم قضية مهمة، وهي قضية (فتيات التيك توك)، وفكرة البنات اللي بيتضحك عليها عشان تخش تطلع لايفات وتجيب فلوس.

خصوصا الفئات اللي زي 'دينا'، معندهمش إمكانيات تؤهلهم للعمل في بنك مثلا ولا شركة، وفجأة لقت طريقة سهلة بتجيب فلوس سريعة، عن طريق 'التيك توك'، وبكده تقدر تحقق أحلامها وتغير حياتها وتخرج بره المكان اللي عايشه فيه ومش متقبلاه.

'دينا' عندها تطلعات، وتعمقنا أكثر في الجزء الثاني من المسلسل في الدوافع وراء اللي هي بتعمله، عشان نصل لإجابات عن أسئلة: هي بتدور على إيه في حياتها؟ عشان كده شايفه إن الجزء الثاني تكملة للشخصية مش دور جديد.

كلمينا عن كواليس مشاهدك مع 'السبتي'

الحمد لله، يعني أنا والفنان أحمد كشك كان بالفعل بدأ من الجزء الأول كيميا ولغة تفاهم بدأناها وبنيناها وطورناها، وكانت حلوة قوي للتفاهم والكيمياء اللي ظهرت بينا في الجزء الثاني، كنا فاهمين قوي الشخصيتين وفاهمين هما عاملين ازاى ودوافعهم إيه ونقاط الشبه اللي بينهم، ده خلا المشاهد تظهر حقيقية ودمها خفيف، بسبب الكيميا اللي بدأت من الجزء الأول.

احكي لنا موقف صعب حصل في كواليس 'العتاولة'

احنا كنا بنصور في الشتاء في 'الماكس' بالإسكندرية على البحر، في جو برد جدا وساعات عمل طويلة، وطبعا المسلسل كبير وفيه نجوم كتير من الشباب ومن نجوم الصف الأول، ففكرة وجود مشاهد فيها كل الناس دي مع بعض متجمعة مكانش سهل، واحتاج ساعات عمل كثير.

دخول 'دينا' عالم 'السوشيال ميديا' قدم رسالة توعية عن أضرارها ومشاكلها .. قولي لنا شايفة الموضوع ده إزاي؟

ظهرت مشاكل كتير الفترة الأخيرة بسبب البنات اللي بيطلعوا 'لايف' على 'تيك توك' وغيره من الأبلكيشنز، اللي بتغريهم بالشهرة والثراءالسريع، وتداعب أحلام البنات بامتلاك رصيد في البنك ويخلوهم يعملوا أي حاجة.

وبقينا نشوف ما يعرف بـ'الجولات' و'التحديات' اللي بيحصل فيها حاجات متصحش وبيقدموا من خلالها محتوى غير لائق، وبنشوف ونسمع عن مشاكل وفائح بسبب الناس اللي بتبعت صور وفيديوهات لبعض، بالإضافة لظهور الذكاء الاصطناعي وسهولة تزييف الصور والفيديوهات، كل ده خلا من الضروري التنبيه بقوة لخطورة ما يحدث، خاصة إننا بالفعل شفنا 'تيك توكرز' ومشاهير كتير اتعرضوا لمشاكل صعبة وصلت في بعض الحالات لنهايات مأساوية.

كل ده حمسني جدا وكان بالنسبة لي فكرة حلوة قوي، قضية حقيقية وقائمة وحاضرة في الفترة اللي احنا عايشين فيها دي، فكنت حابة جدا الفكرة.

لو اتعمل من 'العتاولة' جزء ثالث هتوافقي تكملي معاهم؟

أكيد طبعا، لو في جزء ثالث من 'العتاولة' أحب أشارك فيه، بس أنا حابه حاليا أركز أكثر في تقديم دور مختلف، نفسي أعمل حاجة جديدة، أناقش موضوع تاني وحاجة جديدة مختلفة، بس طبعا لو في 'عتاولة' الجزء الثالث أحب جدا أشارك فيه.

جهزتي إزاي لدور 'دينا'؟ وهل كان في مرجع قدامك لشخصية البنت الاسكندرانية الدلوعة؟

أنا محبتش أبعد عن 'دينا' اللي الناس عرفوها وحبوها في الجزء الأول، اللي اتغير هو المشاعر، بدأت ادخل جوه نفسيتها أكتر وأشوف هي حاسه بإيه؟ وعاوزه إيه؟ ونفسها توصل لفين؟ بس بنفس شخصية 'دينا' القديمه اللي احنا شفناها.

سافرت أمريكا كان عندي 'وورك شوب' في مدرسة للتمثيل هناك، وحضّرت الدور فيها من خلالها يعني، وكان معايا طبعا مدرب تمثيل.

إيه الدور اللي هدى الإتربي نفسها تقدمه؟

نفسي قوي أقدم الأدوار اللي شبهنا شبه جيلنا، المشاكل اللي بتقابل جبلنا، عايزه أقدم مشاكل اللي احنا بنواجهها دلوقتي كبنات في جيلنا.

موضوع 'تيك توك' ده مثلا مشكلة من مشاكل كثيرة بتقابل بنات جيلنا دلوقتي، قضيه البنت اللي بتستسهل وتطلع على 'تيك توك' تعمل حاجات غريبة قدام الكاميرا علشان الناس تبعت لها هدايا (أسود وحيتان) فيتحول ده لرصيد فلوس في حسابها، دي كانت نقطة بالنسبة لي حلوة قوي، حابه أناقشها.

وكمان حابه أعمل مواضيع تانية ليها علاقه بجيلنا وشبهنا، مش موضوعات أو مشاكل بعيد عننا.

مين الفنان اللي نفسك تقفي قدامه في عملك القادم؟

عندي ناس كثيره قوي نفسي اشتغل معاهم، بس حاليا نفسي جدا ابتدي أعمل حاجات مع شباب جيلنا، فيلم أو مسلسل بطولة نجوم من شباب جداد، حاسة إن ده هيبقى دافع قوي لجلنا، احنا بقينا نقدر كشباب نعمل مواضيع لوحدنا، ونقدر نشيل مسلسلات وأفلام وتنجح تحت اسم الأبطال والنجوم الشباب.