كزبرة يوجه رسالة للمسيئين له: ده السبب اللي بيخلي إنسان طيب أول ما ينجح يتحول لإنسان عنده نقص

وجه الفنان الشاب ومغني الراب كزبرة رسالة لمتابعيه للرد على المسيئين له وللفن الذي يقدمه.

كتب كزبرة عبر خاصية Stories في حسابه بتطبيق Instagram: 'كلام مهم.... أول حاجة الحمدلله على نعمة ربنا عليا وحبكم ورسائلكم الجميلة اللي بتوصلني ورد الفعل الجميل منكم على فيلم (الحريفة 2)، كلام كتير نقسي أقوله واعبر بيه ليكم، في كلام تاني مهم محتاج اقولهولكم'.

وتابع: والله يا جماعة الكلام دا نفسي اقوله من بدري، بس حاسس إن دا وقته، أنا مش عارف ليه، كل لما أنجح في ناس بتحاول تطلع صورتي وحشة، أنا بجد نفسيا مابقتش قادر، وبقالي فترة كبيرة كل لما أعمل حاجة حلوة مبقتش عارف اتبسط بيها، ونفسيا مش أحسن حاجة، وربنا اللي عالم الواحد كل اللي يهمه إنه يقدم حاجة تعجبكم وتسعدكم، بس في ناس بتتعامل مع اللي بيقدم حاجة كوميدية على أساس إنه شخص تافه مش موهوب والواحد بيتعامل بطبيعته ومش بيتصنع، بتحاولوا تشوفوا ازاي تطلعوا في عيب قدام جمهوره وأخواته اللي بيحبوه، زي ان يتنسب لي كلام ماقولتهوش، أو يتقلل مني بحاجات قديمة عملتها، وأحيانا بتوصل للتريقة على اسمي، بمجرد ما يعمل حاجة حلوة وتعجبهم.

وأضاف كزبرة كاتبا: 'أنا مش عارف ليه ودا السبب اللي بيخلي إنسان طيب أول ماينجح يتحول لإنسان عنده نقص وعنده حرب مع كل اللي حواليه، زي ناس كتير نجحت وبقوا بيتعاملوا بنرجسية عشان يعرفوا يتعاملوا مع الواقع، فأنا يا جماعة مش عايز أوصل للمرحلة دي، أنا عايز ابقى إنسان طيب وفي حالي واشتغل على نفسي واقدم لكم فن يعجبكم ويبسطكم، هو دا هدفي، فبلاش تتعاملوا مع الواحد بأسلوب هو مش حبه'.

واستكمل كزبرة: شكرا لكل وحد بيدعمني من قلبه، وأي حد بيحب اللي بقدمه، أو حتى بينتقد بس بأسلوب كويس أنتم اللي تهموني وشكرا'.

وأضاف في Story أخرى: في الآخر في قصص نجاح ملهمة كتير تستاهل الناس تتكلم عنها، ممكن تفيد، يمكن أكتر من قصة أحمد بحر كزبرة وأزاي وصل هنا، هكون أسعد كتير لو كان التركيز على شغلي مش على شخصي سواء بالإيجاب أو بالسلب، عشان اتعلم وأطور من نفسي في اللي جاي'.

يذكر أنه يعرض حاليا لكزبرة في دور السينما فيلم 'الحريفة 2: الريمونتادا' طولة نور النبوي، نور إيهاب، أحمد غزي، عبد الرحمن محمد، سليم الترك، خالد الذهبي، نورين أبو سعدة، كريمة منصور والطفلة ريما مصطفى، وتأليف إياد صالح، وإخراج كريم سعد، وإنتاج شركة Tvision (طارق الجنايني).

ومن المقرر أن يستضيف الفيلم عدداً من النجوم، من بينهم نجم الكرة العالمي مايكل أوين، والنجوم المصريين آسر ياسين وأحمد فهمي وأسماء جلال، والمعلق الرياضي أيمن الكاشف.

يأتي هذا بالتزامن مع النجاح الذي يحققه نور النبوي على المستوى الدراما التلفزيونية من خلال مسلسل 6 شهور الذي يُعرض على Watch It محققاً أعلى نسبة مشاهدة على المنصة، وهو أول بطولة تلفزيونية مطلقة لنور النبوي، ويشاركه البطولة نور إيهاب، مراد مكرم، فريدة رجب وسلوى محمد علي، ومن تأليف عمرو أبو زيد، وإخراج مصطفى صولي.