فردوس عبد الحميد: سعيدة برد فعل الولاد الصغيرين على "حرب الجبالي" ... بحاول أصاحبهم علشان يعرفوا شكلي واسمي

قالت الفنانة الكبيرة فردوس عبد الحميد إنها سعيدة باستقبال الجمهور لمسلسل 'حرب الجبالي' الذي عرض مؤخرا، وخاصة الشريحة العمرية من سن 10 إلى 13 سنة.

تحدثت فردوس عبد الحميد خلال لقائها مع الإعلامية إنجي علي في برنامج 'أسرار النجوم' المذاع عبر نجوم إف إم عن سبب انجذابها للمشاركة في مسلسل 'حرب الجبالي' قائلة: 'لما لقيت العمل اللي فعلا فيه حاجة ممكن أقدمها، وزملاء محترمين كتير، وحسيت الألفة بيننا وبين الأحداث اللي بيتناولها المسلسل. ده الفيصل في إني أعمل عمل'.

وعن سر مشاركة عدد كبير من النجوم في 'حرب الجبالي'، قالت فردوس عبد الحميد: 'العمل والنص نفسه، وإن الأحداث ممكن تبقى حقيقية ومش مفتعلة، البيت المصري البسيط زي بيوتنا كلنا، اللي فيه الأمهات والإخوات والضراير، واللي فيه ألفة ما بينهم، كل ده جذب زملاء كتير، وكل واحد له دوره الملائم له'.

وأشارت فردوس الحميد إلى أنها كانت تشعر بالقلق من تأخر عرض المسلسل رغم انتهاء تصويره قبل فترة قائلة: 'المسلسل اتصور في لبنان، وكنا بنخلص تصوير ونخرج مع بعض وكلنا بنحب بعض. كنت قلقانة ليه قعد سنتين مابيتعرضش، والحمد لله اتعرض وحاسة إن الجمهور معجب بالمسلسل'.

أوضحت فردوس عبد الحميد أنها لمست رد فعل الجمهور في الشارع قائلة: 'اللي باسطني خصوصا رد فعل الصبية والبنات الصغيرين من سن 10 لـ 13 سنة، وطبعا بتصور معاهم وأحاول أصاحبهم علشان يتعودوا على شكلي ويعرفوا اسمي'.

وردا على سؤال ما أكثر مشهد تأثرت به، قالت فردوس عبد الحميد: 'مشهد موت الولد ياسين وجع قلبي أوي، تخيلي ولد يتيم تبنته وهو عمره سنتين، وكبرته ودخل الجامعة، وفجأة بدون سابق إنذار يمرض وهي مش مدركة إنه في خطر فظيع، وأخوه أحمد رزق يديله كليته'.

يذكر أن مسلسل 'حرب الجبالي' يشارك في بطولته أحمد رزق، رياض الخولي، انتصار، نسرين أمين، سوسن بدر، أحمد خالد صالح، هبة مجدي، صلاح عبدالله ، فردوس عبدالحميد، من تأليف سماح الحريري، وإخراج محمد أسامة.