هادي الباجوري: أنا ضد مصطلح السينما النظيفة

أكد المخرج هادي الباجوري عن رفضه التام لتصنيف الأفلام السينمائية بتسميات مثل 'السينما النظيفة' أو 'سينما المرأة'، مؤكدا أن هذه التصنيفات غير دقيقة وتؤثر سلبا على العمل الفني وصناعة السينما ككل.

وأوضح هادي الباجوري في لقاء خاص مع الإعلامية شيرين سليمان ببرنامج 'سبوت لايت' المذاع على قناة صدى البلد، قائلا: 'لأ، هي التصنيفات دي هي كاتيجوريز، أنا ضد إن احنا نسميها أفلام بنعملها، يعني أنا ضد فيلم السينما النظيفة ده تصنيف لا يصلح، إنما ممكن نقول أكشن، كوميدي، رومانسي، ما فيش سينما مرأة، فيلم أكشن بس بطولة مرأة، فيلم دراما، سينما مرأة دي لما بنعمل مهرجان أفلام مبنية على حواديت مرأة'.

وتابع هادي الباجوري، حديثه عن موقفه من تصنيف 'السينما النظيفة'، الذي راج في فترات سابقة بسبب رفض بعض الفنانات المشاركة في مشاهد توصف بالـ'جريئة'، قائلًا: 'المشاهد لما بنقول سينما نظيفة، تبقى المشاهد دي مشاهد قذرة، وده ما ينفعش، ما ينفعش نصنف كده، الممثلة جاية بتأدي دور، بتعمل دور فما ينفعش نصنف لوحة إن هي لوحة قذرة، ولوحة تانية لوحة نظيفة، هو ده مش فن؟ ما فيش حاجة اسمها كده'.

وأضاف هادي الباجوري، قائلا: 'هي عندها وجهة نظر مش عايزة تعمل ده، هي حرة، ده موضوع بتاعها، بس مش لازم أصنف الفيلم يبقى نظيف ومش نظيف، مثلا: لو سمحت أنا عندي فيلم بقى حلو قوي بس مع الأسف هو مش نظيف، تعملي دور؟ ما ينفعش، مش حلو أبدا إن احنا نقول كده يعني'.

وأشار هادي الباجوري إلى أن المصطلح بدأ بجملة بسيطة، ولكن الإعلام والعلاقات العامة والصحافة ساهموا في ترويجها بشكل كبير حتى أصبحت معيارا في التقييم، قائلا: 'فالممثل اللي ما كانش عنده مشكلة، ابتدى يبقى عنده مشكلة لإن الناس ابتدت تاخد إن دي سينما نظيفة، ودي سينما مش نظيفة، فهو هيتنظف، هيتصنف في السينما اللي مش نظيفة'.

وضرب هادي الباجوري، مثالا بتأثير هذا التصنيف على اختياراته الإخراجية قائلًا:'فبقى دلوقتي أنا لو عندي دور واحدة رقاصة، ودور حلو، وشخصية مهمة، تحية كاريوكا، مش هعرف أجيب واحدة تعمل الدور ده. عشان مش هتلبس بدلة. عشان بقى في كلمة اسمها سينما نظيفة وسينما مش نظيفة'.

واختتم الباجوري حديثه بالتأكيد على أن هذه التصنيفات تعيق حرية الإبداع وتؤثر على جودة المحتوى، قائلا: 'الموضوع وصل لما بيحصل عندي أنا من وجهة نظري كفنان، كراجل عايز أعمل محتوى حلو، مش عايز قوانين عليا مش، مش حقيقية'.