طارق الشناوي عن قرار منع البلوجرز من التمثيل: لو طبقنا معيار النقابة ماكنتش سعاد حسني ولا منة شلبي اشتغلوا

انتقد الناقد الفني طارق الشناوي قرار نقيب المهن التمثيلية الدكتور أشرف زكي بمنع البلوجرز من دخول مجال التمثيل، معتبرا أن هذا القرار يتعارض مع منطق الفن وروحه، ويخالف مبدأ تكافؤ الفرص والعدالة الإبداعية.

وقال طارق الشناوي خلال لقائه في برنامج مساء الياسمين مع الإعلامية ياسمين الخطيب، على قناة الشمس: 'شايف إن القرار ضد المنطق والعدالة.. منة شلبي وهي عندها 17 سنة ماكنتش بتعرف تمثل، لكن المخرج الكبير رضوان الكاشف علمها التمثيل في فيلم الساحر، ودلوقتي بقت ممثلة قديرة وعندها رصيد كبير، لو طبقنا نفس المعيار ده، منة ماكنتش اشتغلت ولا حتى سعاد حسني'.

وأضاف طارق الشناوي: 'المعيار الوحيد المفروض يكون هو الموهبة.. الجمهور هو اللي بيحكم، وهو اللي يقرر ينجح أو يفشل أي فنان أديله فرصة، لو فشل، الجمهور هيرفضه بنفسه'.

وأشار طارق الشناوي إلى أن كثيرا من نجوم الكوميديا لم يتخرجوا في معاهد فنية، قائلا: 'معظم نجوم الكوميديا زى عادل إمام وسمير غانم خرجين كلية زراعة مش ضروري تبقى خريج معهد فنون علشان تبقى ممثل'.

وكان أشرف زكي أكد على رفضه مشاركة 'البلوجر'و'التيكتوكر' في الأعمال الفنية مؤكدا فرض غرامة مليون جنيه على أي منتج يقرر مشاركتهم في عمل.

وقال أشرف زكي في لقاء تليفزيوني: ''إحنا مروحناش درسنا وإدينا عمرنا للمهنة عشان في الآخر نسيبها لمشاهير التيك توك لأ حد يجي يقعد مكاني، أنا بدافع عن المهنة لن تكون المهنة مهنة من لا مهنة له منبقاش مستلمين مصر هوليوود الشرق ونفرط فيها إحنا مصر أم كلثوم وعبد الحليم وعبد الوهاب مصر فاتن حمامة وشادية وأحمد زكي وعادل إمام ومحمود عبد العزيز وعظماء مش عشان ناس طلعوا على التيك توك عايز تجيبه في فيلم هتدفع غرامة مليون جنيه'.