كريم فهمي: كنت مرعوب من مقارنة "وتقابل حبيب" بـ "ونحب تاني ليه؟"

عبّر الفنان كريم فهمي عن مخاوفه التي رافقته خلال عرض مسلسل 'وتقابل حبيب'، مؤكدًا أن نجاح العمل كان تدريجيًا، وبدأ بشكل قوي منذ الحلقات الأولى، وازداد مع تصاعد الأحداث، لكن القلق لم يفارقه.

وقال كريم فهمي خلال لقائه مع الإعلامية لميس الحديدي في برنامج 'كلمة أخيرة' عبر شاشة ON: 'من أول المسلسل والناس كانت متفاعلة، بس قلقي كان أكبر من أي حاجة، لأني كنت خايف من المقارنة مع مسلسل ونحب تاني ليه؟ وده بسبب إن نفس الثنائي موجود: أنا وياسمين عبد العزيز، وكمان الكاتب عمرو محمود ياسين وعدد من نفس فريق العمل.'

أوضح كريم أنه بذل مجهودًا مضاعفًا لضمان نجاح 'وتقابل حبيب'، لضمان تجاوز نجاح التجربة السابقة، مضيفًا: 'كنت عاوز ننجح أكتر من ونحب تاني ليه؟ عشان كده تعبت جدًا، وتعبت عمرو محمود ياسين أكتر، كنت دايمًا خايف وبدور على كل شيء في كل تفصيلة، ومكنتش بسيب حاجة تعدي من غير نقاش طويل.'

وتابع بابتسامة: 'أنا تعبت عمرو كتير في الشغل، ودايمًا كنا بنتخانق بسبب آراء مختلفة، بس إحنا أصحاب جدًا في الحقيقة. ونفس الشيء بيني وبين ياسمين عبد العزيز، إحنا أصدقاء، لكن في الشغل كل واحد بيفصل الصداقة عن المهنة.'

وعن شخصية 'فارس أبو العزم'، قال كريم فهمي: 'كنت شايل هم الشخصية جدًا، عاوزها تطلع في أفضل صورة ممكنة، وده خلاني طول الوقت في حالة تركيز ومراجعة ونقاش مع عمرو وياسمين، النجاح هو إننا نقدم عمل حقيقي أفضل من اللي قبله.'

تدور أحداث مسلسل 'وتقابل حبيب' حول ليل، وهي امرأة ثرية تتلقى صدمة حياتها عندما تكتشف أن زوجها خانها وتزوج بأخرى سرا وتدخل في صراعات مع عائلتها.

مسلسل 'وتقابل حبيب' من تأليف عمرو محمود ياسين، وبطولة ياسمين عبدالعزيز، كريم فهمي، نيكول سابا، خالد سليم، صلاح عبدالله، بسنت شوقي، محمود عمرو ياسين، وإنتاج تامر مرسي، إخراج محمد الخبيري.