بعد رحيل زياد الرحباني... بالنسبة لبكرا شو؟
klyoum.com
أخر اخبار لبنان:
عقيص لخريس: نفذوا الطائف وحاسبنا بعد ذلكالظاهرة، الفنان المبدع، مجسّد هموم الناس وآلامهم، زياد الرحباني في ذمة الله. كُتب الكثير عنه، وسيُكتب أكثر عنه... وفي وداعه اخترت لكم باقة من أقواله التي عبّر فيها بكل جرأة وصراحة وشفافية، عن وجعه وأوجاعنا:
• قومْ فُوتْ نَامْ، وصِيرْ حلامْ، إنّو بَلدنا صَارِتْ بَلَدْ!
• بيطلعلك واحد مسمّي حالو أسد السُنّة، والثاني نمر الشيعة، والثالث فهد المسيحيين، وهيداك ذئب الدروز... خيِّ، في مجال لكل طائفة تضبّ حيواناتها!
• حاول تكون منيح مع أي حمار يقابلك، ما بتعرف ممكن يصير وزير أو رئيس!
• المصاري اللي انسرقت من لبنان بتكفي لتعليم البقر البلاغة والرقص وعزف البيانو، ولكنها ما بتكفي لتعليم الحمير معنى الوطن!
• شعب بيشرب هالقدّ قهوة... لازم يكون أوعى من هيك!
• زبالة الشوارع مقدور عليها... بس دخلك، زبالة العقول شو ممكن نعمل فيها... يعني كيف ممكن نتصرّف فيها!
• الحرية هي أول 5 دقائق من ولادتك، بعدها سيقررون اسمك... جنسيتك... دينك... طائفتك... وستقضي طوال حياتك تدافع وتقاتل بغباء عن أشياء لم تخترها!
• مُشْ هَمّ بَعد اليومْ إنْ بَهدَلني حَدا... صَارِت حياتي كِلّها شِي بَهدَلي!
• خليك طبيعي وتلقائي وصريح مع الناس... صدّقني، بتخسرهن كلهن!
• فيك تكون كاتب مسرحية من 30 سنة كأنك كاتبها هلّق... مش لأنك إنت بتشوف لقدام، لأنو نحنا مش عم نمشي!
• شعب بينو وبين التفاهم، في سوء تفاهم!
• أنت لاحظ معي، حتى بالموسيقى صوت الطبل أعلى من صوت القانون... يعني بلد موسيقي بامتياز!
• فكّرنا اللي راح منيح... طلع، منيح اللي راح!
• مش كل واحد حامل مسبحة يعني شيخ... يمكن راجع من دبكة!
• لو علّمونا بالمدرسة كيف نتعامل مع واحد جحش وغبي، كان أحسن من «إعرب ما تحته خطّ»!
• بيقولولك من عرق جبينو طلّع مصاري هل الإنسان... كيف هيدا هوّي وكيف ملاينو ولا مرة شايفينو عرقان!
• بتصفّي قلبك... بتصفّي نيّتك... بتصّفي أهبل!
• في ناس مناح ما في منن، وفي ناس منيح اللي ما في منن!
• صعب على إنسان يعترف إنو هو جحش... بس سهل كتير إنّو يستمرّ بالجحشنة!
• حامِل ليرة، بتسوى ليرة... درزي، بوذي، أو كاثوليك!
• في ناس تربّوا على أخلاق حميدة، بسْ للأسف طُلعِت حميدة رقّاصة!
• كلّ سِنة بتقدّمو الساعة... وبترْجَعو البلد عشر سنين لورا!
• لا تخلّي قلبك أبيض لأن الأبيض بيتوسّخ بسرعة!
• هيدي البلاد هيّ اللي بتغيِّر... ما حدا بيغيّرها!
• في ناس افتكرناهم مَحلّ ثِقة، وطلعوا بالآخِر محلّ أحذية!
• مشْ ضروري تضلّ سَهران على جماعة ناموا من زمان!
• أخدنا موقف، ما ضلّ سيارة ما إجت صفِّت فيه!
• وبدنا نكفّي بـ اللي بِقيوا، مشْ بدنا نكفّي ع اللي بِقيوا!
• الله خلقك إنسان، ليشْ مُصرّ على الحَيْوَنَه!
«بعدنا طيبين... قول الله» يا زياد، «إي في أمل»، وسيبقى «عودك رنّان»، «بما إنّو» شعبنا عايش «بلا ولا شي»، وغرقان بـ«فيلم أميركي طويل»، وطالما النظام في بلدنا «شي فاشل»، وما دام قادتنا غارقون في «سهريّة» ويتنعمون في «نزل السرور»، وكانوا دَهْورونا «عا هدير البوسط» «لولا فسحة الأمل»، ونتساءل بعد رحيلك «بخصوص الكرامة والشعب العنيد»، وسؤالنا «بالنسبة لبكرا شو»!