الأستاذ العريبي يتكلم بوجع عن الصمت الرهيب و شعب "فقد الرحمة و انغمس في الرداءة"

الحالة الصحية المتدهورة التي آل اليها استاذ القانون المعتقل جوهر بن مبارك وفق ما ورد على لسان شقيقته و محاميته التي اكدت باكية عن سجين في شبه حالة احتضار بعد 7 أيام من اضراب الجوع الوحشي (وهو ما نفته الادارة العامة للسجون) و ما اثار اللايف من تفاعلات اغلبها تضامنية و لكن في الشق المقابل، هناك موجة تتدفق حقدا و شماتة. و عن هذه الفئة، كتب مساء اليوم الاربعاء الأستاذ العريبي ما يلي على صفحات التواصل الاجتماعي:

'رغم القلب يوجع الكلمة لازم تتقال!! نحن شعب فقد الرحمة انغمس في الرداءة وفي الشماته !! شعب ساكت!! ماهوش مفهوم علاش ساكت ؟؟ على اقل من هكا كان يخرج ويعبر ويحتج!! شنوا صارلو؟؟ ……. على كل حال ندخل في الموضوع:

اليوم السابع في إضراب الجوع الوحشي للمناضل جوهر بن مبارك.

سبعة أيّام من الصمت من الجوع من الإصرار على الموت قدام دولة ما عادش تسمع، وعدالة ما عاد فيها أثر للرحمة بل الظلم هو القاعدة والانصاف استثناء !!! علاش ؟؟ علاش ؟؟ علاش؟؟

البارح شفت فيديو والده عزالدين الحزڨي كان صوت الأب يرتجف وهو ينادي ابنه… تحس الي الوطن كامل يبكي معاه… لكن الحقيقة احساس واهم !! ما فماش وطن يبكي معاه !! فما وطن ساكت!!

واليوم شفت دليلة بن مبارك زميلتي وصديقتي تبكي بحرقة بعد زيارتها لشقيقها في السجن… تبكي وتقول “جوهر مصمم، جوهر يحب يمشي!” مرعب مرعب مرعب يا توانسه!!

تنهار دليلة وينهار كل من بقى عنده قلب… ما نجمتش نشد روحي !! مروح من بلاريجيا كنت بحذا عبير!! برشا وجيعة وبرشا احساس بالظلم !!

أنا شخصيا كنت في بدايات القضية من المحامين اللي نابوا زملاءهم منهم جوهر بطلب من دليلة.

زرتو في المرناڨية أكثر من مرة، وكنت نحكي معاه على الأمل على تونس اللي لازم تبقى حرة وعادلة.

لكن منذ إيقاف الاستاذة عبير موسي تبدلت الأمور… ضغط رهيب تعب نفسي إحساس متواصل بالوجيعة وقهر لا ينتهي…. بل يزيد !! كل يوم عقيدة!!

نفس الاسباب ونفس التعب ونفس الوجيعة والغضب والقهر اللي حكيت عليه البارح في تدوينة صديقتي سنية ، تعب المحامي اللي يطيح وما يلقاش حتى لحظة يرتاح فيها… المحامي الي يبدى موجود وقتلي الناس للكل تغيب!!

جوهر ما هوش رقم في ملف وما هوش متهم في ورقة… في ختم بحث او في لائحة حكم!!

جوهر إنسان حر في آخر المطاف قرر يجوع حتى الموت على خاطر قضية على خاطر كرامة، على خاطر حرية… كما قالت دليلة لو ان جوهر اجرم فعلا كان يتحمل السجن لكن البريء والمظلوم والي يغيش الظلم ما يتحملش السحن ولما يعجز يفقد الامل وتولي الموت ارحم !!! ايه نعم من شدة الاحساس بالظلم .. الموت ارحم !!

لكن الظالم وزبانيته لازم يعرفوا الي روح حوهر وروح كل مظلوم .. في رقبتهم الى ان يرث للله الارض وما عليها !!

دليلة، نعرف وجيعتك وخيتي ونحس بيك!!

جوهر ما هوش وحدو وما يموتش في الصمت خاطر كل حر في تونس اليوم موجوع معاه…. ويجي الوقت وحاجز الصمت يتكسر …!!

الحرية لجوهر!!

الصبر والقوة لدليلة

والعار لكل من يكمم صوت الحق ويخلي الأحرار يموتوا بالجوع في الزنازن!!

سيلعنكم التاريخ وستلعنكن اجيال !!'.