اخبار تونس
موقع كل يوم -جريدة الشروق التونسية
نشر بتاريخ: ٦ أيار ٢٠٢١
وجه النائب ياسين العياري رسالة الى زميله هيكل المكي، رئيس لجنة المالية حول قانون الFCR وفي ما يلي نص الرسالة:
إلى الزميل هيكل المكي، رئيس لجنة المالية، كتلة ديمقراطية/ حركة الشعب،
زميلي العزيز، صحة شريبتك، أما بعد،
إي كيفاش تو؟ شنوة نقول للتوانسة في الخارج و كيفاش نفسرلهم التأخير في النظر في قانون الFCR ؟
خليني نكون صريح معاك زميل، نواب معاك في لجنة المالية، فيهم شكون قلي الي ما تحب تعدي في اللجنة كان القروضات لأسباب سياسية : هاو البرلمان غرقها قروضات و ما يعمل في شيء، خدمة لأجندة الرئيس.
معاك شكون في نفس اللجنة، قلي منغير ما تكسر راسك، الجموع واكلة من عند وكلاء السيارات، بش يرقد القانون في اللجنة إلى الأبد..
زميلي العزيز،
لا أدري هل هذا حق أم باطل، و ما يهمنيش!
الي يهمني هو إنه القانون، راقد!
قانون صبيتو في جويلية، يختفي من المجلس و بسيدي و سيدك يظهر كان في أكتوبر
من أكتوبر، لجنتكم أول جلسة إستماع 12 مارس.
في جلسة 12 مارس، تفاهمنا الجلسة الي مبعد نعملوا الإستماعات و بعد نبداو فصلا فصلا و كان ممكن حسابيا تصوت عليه الجلسة العامة في ماي و يخلطوا التوانسة في الخارج عليه صيف السنا.
اليوم 5 ماي و لا صارت الإستماعات و لا التصويت و لا النقاش.
إش نقول للتوانسة في الخارج؟
عندكم مشاكل في لجنتكم؟ هل تعتقد إنه هذا يهمهم و يعنيهم زميل؟
مهمتك كرئيس هي حل مشاكلكم في اللجنة و خدمة الناس، موش تعطيل الناس بسبب مشاكلكم و مشاكلنا.
صدقا زميلي، طفح الكيل!
و المشكل، عرضنا عليكم في لجنة التونسيين بالخارج الي فيها الكتل الكل، كان لجنتكم عندها برشة خدمة، توة نجريو أحنا الإستماعات و نجيبولكم التقرير هناني بناتي و نبداو التصويت.. رفضتوا و شديتوا صحيح تعملوه إنتوما و ما عملتوهش!
الإستماعات الكل تنجم تصير في نهار واحد.
و التصويت الكله في نهار و نص نهارين، أغلب ما جاء في نص القانون عليه توافق واسع (جميع الكتل صححت فيه إلا الكرامة و الدستوري).
مع الخدمة عن بعد، إنجموا نعملوهم أول الجمعة الجاية و إنتهى الموضوع.
اليوم لأسباب، ما نحبش نعرفها و ما تعنيش التوانسة الي صوتولي و صوتولك، هذا القانون، راقد، مرقد، مدفون.
زميلي العزيز،
حكيت بصراحة و قدام الناس حتى يكونوا شهداء و يفهموا كيف تسير الأمور : قانون مكتوب حاضر عليه مجملا توافق، ينجم يكمل في نهارين، راقد لأسباب تخص و تعني لجنة المالية.
الموضوع مهم جدا للتوانسة بالخارج و الداخل، لذا رجاء :
- فسر للناس ماذا يحدث
- خوذ إلتزامات علنية بصفتك رئيس اللجنة وقتاش يتناقش و يتعدى للجلسة العامة.
مزلت نعتقد إنه ممكن لو تتوفر النية الصادقة، ينجم يتصادق عليه صيف السنا.
ثم ماك تعرف قوة اللوبيات في المجلس زميلي، بعد ما يخرج من لجنتكم، عندي عركة أخرى، مع مكتب المجلس، لعرضه على الجلسة العامة.
اللهم قد بلغت فأشهد.
