إعلان وظيفة يشترط خبرة 10 سنوات.. في مهنة ظهرت السنة الماضية

أعلنت شركة محلية "عم تواكب التطور أول بأول" عن حاجتها لموظف بمنصب منسق تحول رقمي خارق، بشرط أساسي هو امتلاك خبرة لا تقل عن 10 سنوات بالمجال، رغم أن المجال نفسه ظهر من حوالي سنة.

وقالت مسؤولة الموارد البشرية إن الشركة بدها شخص "شاب وطموح وعندو خبرة طويلة بنفس الوقت"، ويكون قادر يشتغل على منصات لسه عم تتحدث كل أسبوع، ويعرف مشاكلها وحلولها من أيام ما كانت فكرة.

شو بدهن بالضبط؟ شغلة بسيطة متل خبرة عملية 10 سنوات على برنامج نزل أول إصدار إلو بـ2025، وشهادة باختصاص لسه الجامعات عم تدرس إذا تعترف فيه، وكمان إجادة لغات برمجة بعضها قيد التطوير والبعض التاني قيد الحلم، كما يفضل وجود مراجع من مدراء اشتغلوا معه بهالمجال قبل ما ينوجد.

شو بيعطوك بالمقابل؟ أكدت الشركة إن الراتب "ممتاز وتنافسي"، يعني الموظفين بيتنافسوا مين بيقبل بأقل راتب، وفي حوافز مغرية مثل وعود بالترقية إذا قدر الموظف يثبت إنو بيعرف يشتغل بدون ما ينسأل كيف تعلم.

وقال خبراء إنو هالنوع من الإعلانات صار طبيعي، لأن الشركات صارت تفضل موظفين جاهزين بكل شي، حتى لو كان المطلوب يختصروا الزمن أو يرجعوا فيه لورا شوي.

وختمت الشركة إعلانها بدعوة الراغبين للتقديم قبل الموعد النهائي يلي كان مبارح.

اخبار سوريا على مدار الساعة