بلاغ مشترك "ناري" من إلترات الوداد والرجاء بسبب أحداث الشغب

أصدرت الفصائل المشجعة لفريقي الوداد والرجاء الرياضيين، 'الكورفا نورد' و'الكورفا سود' على التوالي، بلاغا مشتركا بخصوص أحداث الشغب التي شهدتها بعض المناطق بمدينة الدار البيضاء، وأسفرت عن إصابات في صفوف الجانبين.

وطالبت 'إلترات' قطبي العاصمة الاقتصادية بالرجوع لجادة الصواب، والابتعاد عن أجواء الاحتقان والشغب.

وجاء البلاغ المشترك من 'Curva sud -Curva nord' كالتالي:

من ديما كانتغناوا بلي الحركية كانت هي المتنفس و هي لي كاتخلينا نعيشوا الشغف ديالنا بما يرضي الله. إلا أننا مؤخرا ولينا كانشوفوا أحداث لا علاقة ليها بالحركية ولات عوض أنها تحيينا كاتقتلنا، أحداث لي أي عضو أولترا مايمكنش يقبل بيها ومايمكنش يسمح ليها تولي جزء من الموفمون لي كانعيشوه، حيث الموفمون أكبر وأنقى من أنه يتوسخ بتصرفات بحال هادي و يتلطخ بدماء العقاب ديالها قدام الخالق صعيب نتصوروه.

قلنا ومازال غا نقولوا بلي المنافسة خصها تبقى فالتيران، بلي المنافسة خصها تكون شريفة حيث هاداك هو السبيل الوحيد باش نحافظوا على حركية نقية، باش نعيشوا شغف بلا شغب، باش الوالدين يبقاو هانيين على اولادهم وباش الدم يبقى كايجري فالعروق عوض يسيل من الجرح.. وماشي كاع الجروح كايتخيطوا.

حنا كلنا ملزومين باش نتاقيو الله فبعضياتنا وفريوسنا و والدينا. الغروبات حاولوا و مازال كايحاولوا يديروا قطيعة مع أعمال الشغب لي كاتجرنا لحوايج تا واحد فينا ما باغيها، و لكن كل مرة كانلقاو بلي لي درناه ماكافيش.

وهادشي علاش هاد المرة خصنا نكونوا أكثر صرامة وأكثر مسؤولية من قبل ونلتزموا التزام حقيقي بالقرارات لي غادي نخرجوا بيها فالمستقبل القريب.

خص الأعضاء من جهتهم كذلك يثبتوا بلي أحداث الشغب ما هي إلا استثناء وماشي قاعدة فالحياة ديال المومبر و التعبير ديالهم على الانتماء للغروب مايكونش بالبرودويات فقط ويكون بتطبيق الأمور لي غانتفقوا عليها الا كنا بصح بغينا نكونوا فأجواء لي تنقي وتخلينا نعيشوا الموفمون أولترا ماشي يقتلنا موفمون ماعرفناه شنو هو.

حركية نقية، شغف بلا شغب.

انضم إلينا واحصل على نشراتنا الإخبارية