حسام حبيب يعتذر لـ شيرين عبد الوهاب: فنانة كبيرة وعظيمة وصوت الوطن العربي مش صوت مصر

وجه المطرب حسام حبيب اعتذارا للفنانة شيرين عبد الوهاب مؤكدا أنه يتمنى لها كل النجاح والتوفيق.

وقال حسام حبيب في لقاء مع ET بالعربي: "علاقتي بشيرين عبد الوهاب زي الفل ولا في أي حاجة الإخوات بيتخانقوا والأصحاب بيتخانقوا وإحنا والله العظيم لو الناس عرفوا خناقتنا بتضحك كلها حاجات بسيطة، شيرين فنانة كبيرة وعظيمة وصوت الوطن العربي مش صوت مصر بس وأنا بعتذر لها لو كنت قولت حاجة في يوم من الأيام تضايقها في وقت زعل وبقولها أشوفك دايما النجمة الأولى، هي بالنسبالي أنا كواحد من معجبينها هي نجمتي المفضلة".

وتابع حسام حبيب: "شيرين صوت عبقري ميتعوضش مفيش حد يملى مكانه فبقولها حبيبة قلبي أشوفك دايما متألقة وبقول للناس أن مفيش بيني وبينها أي نوع من أنواع المشاكل بالعكس".

وتحدث حسام حبيب عن أزمة شيرين الأخيرة بعد غنائها في مهرجان موازين "بلاي باك" وقال: "شيرين دايما بتحترم جمهورها جدا وكلنا ساعات مبنبقاش في كامل لياقتنا، شيرين بتحب جمهورها أكتر من أي حد في الدنيا وبتعتبر جمهورها أهلها أنا ساعات كنت بغير من جمهورها، يا شيرين يا حبيبة قلبي أنا بقولك أنتي واحدة علمتينا كلنا يعني إيه إصرار علمتينا يعني إيه حد يكون محب لفنه وجمهوره وزي ما إنتي معودانا دايما شايفينك كده وكلنا بنتعلم منك رغم صغر سنك".

وأحيا حسام حبيب حفلا غنائيا ضمن فعاليات موسم جدة بعنوان "أحاسيس" يوم 18 يوليو، شارك به 6 مطربين من مصر هم: هيثم شاكر، وحسام حبيب، ومحمد عدوية، ولؤي، وأحمد فريد، وكريم محسن.

لايف ستايل على مدار الساعة