خاص ميشيل ميلاد لـ"في الفن": أحلى حاجة في الدنيا الشغل مع أحمد أمين ومش مستعجل على البطولة المطلقة وعيدنا تصوير مشاهد كتير بسبب الضحك في "هي كيميا"

قد يكون عام 2026 هو عام الفنان ميشيل ميلاد، بداية من نجاح دوره في فيلم "السادة الأفاضل" ثم تألقه في موسم رمضان هذا العام.

يشارك ميشيل ميلاد في رمضان 2026 بمسلسلي "هي كيميا" عرض في النصف الأول من الشهر، و"النص التاني" وعرض في النصف الثاني من الشهر الكريم، وفي كلا العملين حقق نجاحا كبيرا وأشاد الجمهور بالكوميديا التي يقدمها والشخصيات التي يظهر بها.

تواصل FilFan.com مع ميشيل ميلاد ليحدثنا عن كواليس الأعمال وتحضيراته للشخصيات التي يقدمها وجديده الفترة المقبلة وهل يفكر في تقديم البطولة.

في البداية تحدثنا مع ميشيل ميلاد عن شخصية "عماد" التي قدمها في مسلسل "هي كيميا" ولاقت استحسان الجمهور، وقال عن تحضيره لها: "قعدت اشتغل على الورق أشوف أبعاد الشخصية وعلاقته بـ"سلطان" مصطفى غريب و"حجاج" دياب، قعدت أشوف شبكة العلاقات وأشوف طريقة ضحكه هتبقى منين، اللي بعمله مع كل شخصية والحمد لله طلع بشكل كويس".

تعليقات كثيرة من الجمهور عن مشاهد من مسلسل "هي كيميا" أنها عفوية، فسألنا ميشيل ميلاد عن إن كان هناك إضافات قدمها لم تكن مكتوبة من البداية في السيناريو وقال: "في حاجات طبعا بنضيفها دي طبيعة العمل الكوميدي أن مبتبقاش الحاجات كلها مكتوبة بيبقى معانا موضوع وحسب الممثلين الموجودين بيكون عندهم قدرة على الابداع والإفيهات ودا حصل، بس طبعا في ورق إحنا ماشيين على خطاه، لكن مثلا "معلم عم حجاج" دي مكنتش مكتوبة في الورق هي جايه من خوف الشخصية فبقى بينادي عليه بالشكل دا".

ومع أي عمل كوميدي هناك دائما مشاهد قد يتم إعادة تصويرها أكثر من مرة وقال ميشيل ميلاد عن هذا الأمر: "عيدنا تصوير مشاهد كتير، كل المشاهد اللي بين "عماد" و"سلطان" كتير منها عيدناها بسبب إننا بنضحك يجي فجأة إفيه وإحنا بنقول أو يكون لحد رد فعل مكناش متفقين عليه".

وعبر ميشيل ميلاد عن سعادته بتعاونه مع مصطفى غريب ودياب في المسلسل وقال: "كواليس الشغل كانت كلها ضحك هما ناس لذيذة جدا ومحبه للعمل وبقينا أصحاب أوي، والكيميا اللي ظهرت على الشاشة هي اللي كانت موجودة في الكواليس ودا اللي خلى الموضوع مميز".

ومع نجاح أي مسلسل خاصة من المسلسلات القصيرة 15 حلقة يتسأل الجمهور هل سيتم تقديم جزء تاني من العمل وقال ميشيل ميلاد: "مفكرناش في موضوع الجزء التاني محدش اتكلم في حاجة زي كده ولسه مش عارفين، الموسم لسه مخلصش".

وعبر ميشيل ميلاد عن سعادته بردود الفعل على المسلسل قائلا: "ردود الفعل كانت جميلة منها أننا ساهمنا أنا ومصطفى غريب ودياب أننا نكون من المسلسلات الكوميدي اللي الناس بتشوفها في رمضان وكنا سبب أن الناس تبقى مبسوطة ودا شيء يسعد أي بني آدم".

وإلى جانب "هي كيميا" يشارك ميشيل ميلاد في الجزء الثاني من مسلسل "النص" وعبر عن سعادته بالعمل مع أحمد أمين قائلا: "أحلى حاجة في الدنيا الشغل مع أحمد أمين، راجل عظيم وعنده كل الحاجات اللي أي إنسان يتمناها تكون موجودة في البني آدم اللي بيشتغل معاه إنسانيا وفنيا، عنده كل الصفات اللذيذة التواضع والالتزام وحب وانضباط، راجل فنان كبير".

وعن كواليس العمل في مسلسل "النص التاني": "كواليس الشغل في "النص" كلها جميلة كل الناس الموجودة ناس محترمة وجميلة جدا، وردود الفعل على الجزء التاني من المسلسل الناس كلها مبسوطة ومبهورة فالحمد لله كل التعليقات جميلة".

وخاض ميشيل ميلاد خلال شهر رمضان 2026 تجربة المسلسل الإذاعي مع الفنان أحمد عز في مسلسل "الفهلوي" وقال عن هذه التجربة: "أحمد عز راجل جميل أنا بحبه اشتغلنا مع بعض في المسرح قبل كده، حبيت إني أعيد التجربة معاه وكانت تجربة ممتعة جدا، الإذاعة صعوبتها أن التعبير بالصوت فقط، ودي كانت متعتها بالنسبالي إزاي تعرف تطلع كل حاجة بأفضل طريقة صوتك اللي بيعبر عن كل حاجة ودا ممتع جدا".

وبعيدا عن شهر رمضان، عرض لميشيل ميلاد في بداية العام فيلم "السادة الأفاضل" وحقق نجاحا كبيرا وكان الجمهور يردد إفيهاته، وسألنا ميشيل ميلاد هل يقبل فكرة أن يقدم شخصيته في "السادة الأفاضل" ولكن في عمل منفصل وعن رأيه في البطولة المطلقة وقال: "لا محبش أعيد تقديم شخصية، لما نخلص اللي عندنا نشوف اللي عملناه، وفكرة البطولة المطلقة مش مستعجل عليها كل حاجة في وقتها حلوة، كل حاجة لما تمشي براحة وفي وقتها المظبوط هتطلع مظبوطة أي حاجة فيها استعجال متبقاش ألطف حاجة".

وعرف الجمهور ميشيل ميلاد كممثل كوميدي لكنه من الآن يريد تقديم نفسه في أدوار متنوعة وأوضح لنا: "ممكن أقدم حاجة مش كوميدي اللعبة الحلوة هلعبها الدور هو المهم، حاجة كوميدي حاجة تراجيدي هقدمها وأحب جدا أعمل كده".

وعن جديده الفترة المقبلة قال ميشيل ميلاد: "نازلي في العيد فيلم "برشامة" وفيلم "إيجي بيست" ويارب ينالوا إعجاب الجمهور".

بيتر ميمي يرد على كابتن إيلا بعد تعليقها على مسلسل "صحاب الأرض"

لايف ستايل على مدار الساعة