رانيا فريد شوقي: والدي رفض يطلق هدى سلطان لمدة 8 شهور

حكت الفنانة رانيا فريد شوقي عن علاقة والدها الراحل فريد شوقي بالفنانة الراحلة هدى سلطان، وكيف رفض في البداية تطليقها لأنه كان يحبها كثيرا.

ونشرت رانيا فريد شوقي فيديو تحكي فيه عن علاقة والدها بهدى سلطان حتى بعض الانفصال وكتبت تعليقا على الفيديو: "من أكتر الحكايات اللي بحب أشاركها… علاقة بابا بـ هدى سلطان كانت مليانة تفاصيل جميلة، فيها حب واحترام كبير. اتكلمت عنها من قلبي، زي ما شفتها بعيني".

وقالت رانيا فريد شوقي في الفيديو: "علاقة بابا بطنط هدى سلطان هما اتجوزوا عن حب وكانت ساعتها طنط هدى مشهورة أكتر منه، اتجوزوا وخلفوا ناهد ومها، وناهد كانت هي الطفلة المدللة أوي عندهم البكرية بتاعتهم، بابا قبل كده كان متجوز زميلته في المعهد قسم نقد أستاذة زينب عبد الهادي وخلف منها منى أختي الكبيرة خالص وطنط هدى برضو كانت متجوزة وعندها نبيلة بنتها زي القمر، أول فرحتهم كانت ناهد فريد شوقي اللي هي فيما بعد اشتغلت مع بابا في المكتب كموزعة وبعدين أنتجت".

وتابعت رانيا فريد شوقي: "كان بينهم قصة حب كبيرة فعلا وكانوا بيغيروا على بعض وناهد كانت دايما هي اللي بتحكي، بابا كان بيحكي حاجات قليلة عشان أمي، بس ماما مكنش عندها المشكلة دي خالص يعني كانت بتتقابل هي وطنط هدى عادي وفي فترة طنط هدى قعدت في البيت معاهم مع ماما وبابا لأن كانت مها أختي الله يرحمها اتجوزت أبو أول أولادها كانوا مسافرين وعملوا حادثة واتنقلوا على المستشفى ومقالولهاش أنه أتوفى في الأول لأنها كانت حامل وقتها وبعد ما طلعت من المستشفى قعدت في البيت عند بابا وكانت طنط هدى معاها قعدوا معاها فترة وهي عايشة مع بابا في البيت بتاع 4 أو 5 أيام، أمي مقالتش إزاي دي كانت طليقتك، اعتبرت أن طبيعي الست تيجي تقعد مع بنتها في الظروف دي ودا الذكاء بتاع ماما تعرف تحتوي متفتعلش أزمات وإحنا اتربينا واتعلمنا منها دا الغيرة في التصرف اللي محتاج غيرة لكن غيرة في المطلق مش مفروض".

وأكملت رانيا فريد شوقي: "كانت علاقته بطنط هدى عادية مكنش في أزمات لأن هما زي ما اتجوزا عن حب انفصلوا أن كل واحد اقتنع، هو كان رافض يطلق طنط هدى قعد فترة يجي 8 شهور رافض وهي تكتب في الجرايد أنا عايزة الطلاق وهو يكتب أرفض إني أطلقها دي الست اللي حبيتها واللي وشها كان حلو عليا وعملنا أفلام ومجد سوا لكن في النهاية تم الطلاق مش هقول تفاصيل لأن معرفش بالظبط حصل إيه لكن المهنة الواحدة بيبقى صعب أوي الفنان بيكون محتاج حد متواجد في حياته الفن بيخلي أن كل واحد بيجري بيشوف شغله ويسافر ودا مع الوقت الطويل يبقى صعب".

يذكر أن رانيا فريد شوقي شاركت في رمضان 2025 في مسلسل "الأميرة: ضل حيطة" و "حسبة عمري".

لايف ستايل على مدار الساعة