عمرو يوسف يستعيد ذكريات أول مشهد جمعه مع نور الشريف في "الدالي": مطلعليش صوت
klyoum.com
استعاد الفنان عمرو يوسف ذكريات مسلسل "الدالي" وأول مشهد صوره مع الفنان الراحل نور الشريف.
وحكى عمرو يوسف عن كواليس المسلسل خلال لقائه في بودكاست "فضفضت أوي" مع معتز التوني: "أول يوم تصوير ليا صورت مع حبيبي الأستاذ الكبير صلاح عبد الله وأنا أعرفه من قبل ما نشتغل سوا هو صديقي، أتحول عليا في المشهد فاتخضيت منه بس وقفت قصاده بعد ما خلصنا بقوله إيه دا يا صاصا قرصت عليا كده ليه قالي إيه في إيه اشتغل، بس لقيت نفسي واقف قصاده وبمثل".
وتابع عمرو يوسف: "بعدها بيومين كان عندي أول مشهد مع أستاذ نور الشريف كان بقالي أسبوع بمثل في المسلسل، وكنت حافظ كل حاجة في المشهد هو المفروض بيجيلي البيت وأنا صحفي شريف وبيقولي أنت بتكتب وحش عني ليه، بدأت أحس بتوتر بسيط قبل ما نبدأ بـ3 دقايق فجأة ضربات قلب خفيفة ومش عارف مالي كلمة أكشن اتقالت من هنا لقيت مفيش صوت مطلعليش صوت وبدأت أعرق وأستاذ نور مش بيعمل حاجة وأنا علاقتي بيه كانت حلوة لأننا قعدنا فترة نعمل بروفات يعني مش أول مرة اشوفه بس جيت أمثل قدامه راحت مني خالص، قلتله معلش ثانية واحدة هدخل الحمام دخلت الحمام ببص في المرايه بدأت اهزأ نفسي في إيه مالك وبدأت أغسل وشي بمايه ساقعة وطلعت قلت أنا جاهز وعملت المشهد بعد كده بدقيقتين تلاتة قالي أحنا جايين هنا بكرا ولو عاوز تصوره بكرا تمام كان ذوق جدا وشخص استثنائي هو لمس المشكلة وبعد كده بقيت سهلة".
وعن الفنان الراحل نور الشريف قال عمرو يوسف: "أستاذ نور دايما بقول أن هو بعيدا عن الكلام اللي بيقوله كلنا كنا بنتعلم من تصرفاته هو كان قدوة في الشغلانة دي كان بيجمعنا وكان يحب يقعد ويسمعنا كان شخص استثنائي ومثقف جدا وحابب الشغلانة بجد مدرسة متنقلة وهو ماشي بيدلدق ثقافة وفن وكنا بنستفيد جدا منه".
يذكر أن عمرو يوسف يعرض له فيلم "درويش" في دور العرض السينمائية.
ويشارك في بطولة فيلم "درويش" مع عمرو يوسف كل من: دينا الشربيني، وتارا عماد، ومصطفى غريب، ومحمد شاهين، وخالد كمال، تأليف وسام صبري، وإخراج وليد الحلفاوي.