أحمد سعد عن إطلالته المثيرة للجدل: مبعملش حاجة حرام

رد الفنان أحمد سعد على الانتقادات التي وجهت له بعد اللوك الذي ظهر به الفترة الأخيرة ووضعه بعد الحلي في ذقنه.

وقال أحمد سعد في لقاء مع blinx now: "اللوم مبيأثرش معايا خالص الناس كلامها كتر عليا أوي، كلام الناس مبيشغلنيش ومبيزعلنيش ومبيضايقنيش والمشكلة مش فيا المشكلة في الناس بيحبوا يشوفوا حاجات غريبة عشان يتكلموا عليها، لما بلبس بدلة عمري ما شفت حد قالي الله إيه البدلة الجميلة دي، عايزين يشوفوا حاجة غريبة ليه لأ خلاص يلا بينا".

وتابع أحمد سعد: "مبعملش حاجة حرام أهم حاجة ميكونش حرام وميكونش ليه علاقة بالدين أنا مش متشبه بالنساء لأن مفيش نساء عندها دقن لحد دلوقتي يعني مش عارفين الموضة هتروح فين".

على جانب آخر، طرح أحمد سعد "الألبوم الفرفوش" ويضم أغنيات "كوتي" و"خبر عاجل" و"جوزها" و"أوبا" و"ورد".

وكان أحمد سعد تحدث عن فكرته الجديدة بطرح ألبومات مختلفة وقال: "أنا عايز اقول خبر أول مرة أقوله السنة دي عامل حاجة إن شاء الله تكمل عامل 5 ألبومات كل ألبوم ليه موضوع واحد بس، الأولاني دراما بس 5 أغاني اسمه الألبوم الحزين والألبوم التاني ألبوم الفرفشة والانبساط دا اللي واخدين عليه وبنهزر فيه، والألبوم التالت الأغاني اللي بترقص بتاعة الصيف والألبوم الرابع أغاني قديمة أغاني الموسيقى العربية زي بتاعة أم كلثوم مش إحياء لأغاني أم كلثوم وعبد الحليم لأ لكن أغاني موسيقى الحقبة الزمنية دي، والألبوم الخامس الأوركسترا".

يذكر أن أحمد سعد شارك مؤخرا ضمن لجنة تحكيم برنامج The Voice مع رحمة رياض وناصيف زيتون.

لايف ستايل على مدار الساعة