محمود سعد يكشف تفاصيل الأيام الأخيرة في حياة نبيل الحلفاوي: مصاب بالسرطان ورسم خريطة لمدفنه

كشف الإعلامي محمود سعد تفاصيل الأيام الأخيرة في حياة الفنان الراحل نبيل الحلفاوي والمرض الذي عانى منه.

وحكى محمود سعد في فيديو عبر قناته على YouTube: "اللي حصل زوجة الفنان نبيل الحلفاوي قالتلي من 20 يوم أنه حالته وحشة جدا، كلمته قالي "أنا تعبان شوية" وكان آخر مرة شفته في أبريل في وداع صلاح السعدني، لقيته خاسس أوي".

وتابع محمود سعد: "في الأيام الأخيرة في المستشفى كنت بتكلم مع وليد الحلفاوي ابنه، قالي أنا عايز أقولك على حاجة "بابا قالنا كلام مهم عن علاقتكم ببعض وقالنا خلوا بالكم من محمود لما يحصلي حاجة هو اللي هيعملكم كل حاجة لما تحتاجوا حاجة خليكم معاه"، لأنه في يوم من الأيام وإحنا راجعين من دفن الكاتب أسامة أنور عكاشة قالي أنا عندي مشكلة أن التربة بتاعتنا في مكان ضيق هنعمل إيه، وقالي إنه عامل خريطة للمدفن للطريق ليه".

وأكمل محمود سعد: "لما روحنا المقابر وكنا بليل توهنا وبقيت أضرب كف على كف، مع أني كنت كلمت وليد الحلفاوي وقلت له على الخريطة، لكن توهنا زي ما نبيل الحلفاوي كان قايل".

وعن آخر الأيام في حياة نبيل الحلفاوي وإصابته بالسرطان قال محمود سعد: "مكنش في غيبوبة كان نايم مش عايز ياكل ولا يتكلم، كان أخوه غير الشقيق دكتور مجدي الصيرفي يسأله حاسس بينا يرمش بعينه، وبعدها بيومين، توفى بمنتهى الهدوء زي ما كان عايز، وعرفت أنه مريض بالمرض الخطير من الدرجة الرابعة بس مكناش نتصور أنه هيتوفى بهذه السرعة".

ورحل الفنان نبيل الحلفاوي عن عالمنا الأحد 15 ديسمبر، عن عمر ناهز 77 عاما.

ويقام عزاء نبيل الحلفاوي مساء اليوم، الثلاثاء 17 ديسمبر، في مسجد الشرطة بالشيخ زايد بعد صلاة المغرب.

لايف ستايل على مدار الساعة