رسالة عمرو أديب لـ شيرين عبد الوهاب: لو سمعاني أظهري واتكلمي

تحدث الإعلامي عمرو أديب عن الفنانة شيرين عبد الوهاب ووجه لها رسالة طالبها فيها بالظهور حتى تطمئن جمهورها عليها.

وقال عمرو أديب خلال برنامجه "الحكاية": "في مسألة تحولت إلى هيستريا موضوع شيرين عبد الوهاب، أنا بحب شيرين ورأيي أنها من أعظم الأصوات اللي ظهرت الـ30 سنة اللي فاتت، أنا من مجانين شيرين، وأظن آخر لقاء طويل عملته كان معايا ولما عملنا اللقاء مكنش فيه أي مشاكل وقعدت من أول اللقاء لآخره مكنش في أي مشاكل ودا ردا على بعض الحاجات اللي اتقالت، اتكلمت في كل حاجة وهي مشكلتها أن لما تكلمها بتتكلم".

وتابع عمرو أديب: "في حاجة موجودة على السوشيال ميديا الناس بتنادي على شيرين إنتي فين؟ الأمر فيه حاجتين عندنا مأساة موسيقية أن أغانيها مش موجودة مقفول عليها، خناقة ما وحقوق، وفي مسألة داخلية بحمل شيرين مسئوليتها هي شيرين فين وحالتها الاجتماعية إيه ونشاطها فين؟ شيرين مختفية الأمور متسابة، شوية يطلع بيان يتقال أنه بصوتها وشوية يتقال دا ai أو يطلع بيان عنها ثم يصدر تكذيب".

وأكمل عمرو أديب: "يا شيرين أنا مابقولكيش اتكلمي معايا أنا مش مستني سبق لكن حرام يا بنتي أنا حاسس أن شيرين بتخلص أنا معرفش هي فين ومين معاها ومرتبطة بمين وصحتها عاملة إزاي ومحدش يعرف حاجة، شيرين دي ثروة مصرية وثروة عربية أنا شايف أن في حالة من حالات الإنكار ناس بتقول سيبوها في حالها طيب هي فين؟".

واختتم عمرو أديب كلامه: "طبعا الخير والبركة في المطربات الموجودين وعندنا مطربات عظيمات مش عايز أدخل في مقارنات، لكن حرام شيرين ولا حد عارف يوصلها أو يكلمها ويراضيها ويفرج عن أغانيها الوضع بقى عادي، شيرين مش موجودة وأغانيها راحت ومنعرفش عنها حاجة ويمضي الأمر، أنا بدق ناقوس الخطر، حد يلاقيلنا شيرين أو لو سمعاني أظهري يا شيرين واتكلمي مش معايا دي مش دعوة لبرنامج، أبحثوا معي عن شيرين".

لايف ستايل على مدار الساعة