كندة علوش عن تكريمها بمهرجان أسوان: بنتي فرحانة بتكريمي وعايزة تحتفظ بالجائزة

عبرت الفنانة كندة علوش عن سعادتها الكبيرة بتكريمها ضمن فعاليات مهرجان أسوان الدولي لأفلام المرأة، مؤكدة أن شعورها بالسعادة لم يكن بسبب الجائزة فقط، بل بالحب الكبير الذي لمسته من أهالي أسوان خلال الندوة الخاصة بها.

وأكدت كندة علوش، في لقاء مع الإعلامية شيرين سليمان، ببرنامج "سبوت لايت" المذاع على قناة صدى البلد، قائلة: "سعدت بالندوة دي يعني زي سعادتي بالتكريم ده، لما دخلت الندوة وشفت إن الصالة كاملة العدد، وشوفت إن كلها من أهالي أسوان، سعادتي كانت لا توصف، إن هم يعني عملوا مجهود وجم وعايزين يشاركوا وعايزين يسألوا، عشان كده قررت إن الندوة تكون تفاعلية بيني وبينهم، أسمعهم مش بس يسمعوني، وهم قالوا وحكوا مشاكلهم وتطلعاتهم وإيه اللي هم عايزينه من المهرجان ده؟ إيه اللي هم عايزينه من السينما ككل؟ فحقيقي سعادتي لا توصف وممتنة لأهالي أسوان وسيدات أسوان اللي جُم مخصوص عشان يحضروا الندوة ويشاركوني يعني".

وتحدثت كندة علوش عن وجود أبنائها خلال مشاركتها بالمهرجان، قائلة: "حياة بقى عايزة تاخد الجايزة، وعجبها شكل الجايزة، فقلت لها ده ليكي هي عايزة تمتلكها يعني، وهم فرحانين يمكن كريم صغير لسه مش مقدر، بس حياة فاهمة إن احنا جايين ماما هتاخد جايزة، فهي فرحانة بالموضوع ده".

وكشفت كندة علوش، عن برنامج زيارتها في أسوان، قائلة:"عملنا رحلة في النيل، رحنا معبد فيلة، رحنا هيسة، وروحنا غرب سهيل، والسوق اشترينا حاجات ووريتهم القرية النوبية والبيوت، يعني أنا حريصة إن أنا في قعدتي دي أوريهم كل المعالم".

وفي ختام حديثها، أشادت كندة علوش بالمهرجانات التي تقام خارج القاهرة، قائلة: "سعيدة بالمهرجانات اللي بتتعمل بره القاهرة، يعني القاهرة بلد عظيمة فيها مهرجان عظيم، دلوقتي بقى فيه في الجونة مهرجان عظيم، بس أنا سعيدة بأن الدولة وإن المؤسسات بتدعم المهرجانات اللي هي يمكن تبدو مهرجانات صغيرة، إلا أنها مهرجانات شديدة الأهمية، وبدعو كل الأساتذة الممثلين والنجوم والمخرجين والصناع إن هم يجوا ويشاركوا في المهرجانات دي عشان هي حقيقي بتعمل فرق".

يذكر أن كندة علوش شاركت في رمضان 2025 بمسلسل "إخواتي" مع نيللي كريم، روبي، كندة علوش، جيهان الشماشرجي، حاتم صلاح، نبيل عيسى، على صبحي، إسلام حافظ، وغيرهم من الفنانين، وهو من إخراج محمد شاكر خضير، وتأليف مهاب طارق وإنتاج شركة "ميديا هب- سعدي جوهر".

لايف ستايل على مدار الساعة