صفية العمري: قفلت السكة في وش رشدي أباظة مرتين وافتكرته بيعاكس

استعادت الفنانة صفية العمري ذكريات تعاونها مع الفنان رشدي أباظة في فيلم "أبدا لن أعود" الذي أنتج عام 1975، وموقف طريف حدث بينهما.

حكت صفية العمري خلال لقائها في برنامج "كلام الناس" مع ياسمين عز، عن مكالمة رشدي أباظة لها وما حدث بينهما عندما اعتقدت أنه شخص يعاكسها.

وقالت صفية العمري: "اللي حصل أنا كنت لسه جديدة وكان التليفون الأرضي والساعة 3 الصبح، التليفون رن برد لقيت حد بيقول أنا رشدي أباظة، فقلت عيب يا فندم افتكرت حد بيعاكس فقفلت السكة، رجع كلمني قالي أنا رشدي أباظة قلت له تاني أنت مش مكسوف وقفلت السكة مرة تانية".

وتابعت صفية العمري: "التليفون رن تاني طلعت نادية لطفي قالت لي يا قطة كانت مسمياني القطة، إحنا عايزينك في فيلم كذا تعالي بكرا، وبعدين كلمني مدير الإنتاج قالي تركبي قطر الساعة 8 وتنزلي سيدي جابر، وأنا مذهولة كان فيلم "أبدا لن أعود"، مكنتش مرتبة نفسي ومعنديش الهدوم، قعدت اختار أي حاجة وطلعت في الفيلم "عرة" جدا مش مجهزة روحي صورت في نفس اليوم، أنا سافرت الساعة 8 الصبح وصلت الساعة 10 أخدوني على الفندق ولبست ونزلت".

وحكت صفية العمري عن ظهورها في مشهد بالمايوه موضحة أن هذا الأمر كان عاديا خلال فترة السبعينيات وقالت: "وقتها كان عادي جدا جدا وحتى نادية لطفي كانت لابسه مايوه، لكن أنا لما بشوف نفسي دلوقتي بتضايق جدا لأن من يومها أنا ملبستش مايوه".

وتابعت صفية العمري: "أنا كنت جديدة ومقدرش أقول لأ للمخرج لأن مكنش ينفع أي وجه جديد يتناقش مع المخرج ويقوله لأ أنا مقدرش وقتها متجيش مع السلامة، الفكرة إني بنقذ ولد من المايه فلازم أبقى لابسه لبس مناسب للحدث".

لايف ستايل على مدار الساعة