رضوى الشربيني تسرد قصة سونيا وصفوت بـ"الذكاء الاصطناعي"

أطلقت الإعلامية رضوى الشربيني الموسم الجديد من برنامجها الشهير "هي وبس"، عبر شاشة قناة DMC، مساء الثلاثاء، بعد سنوات من النجاح عبر شاشة CBC سفرة.

وكشفت رضوى خلال الحلقة الأولى تفاصيل وكواليس عودتها، كما عرضت أولى القصص الحقيقية ضمن الفقرات الجديدة للبرنامج.

كواليس العودة.. "مساء الفل والهنا والسعادة"

استهلت رضوى الشربيني الحلقة بتحية اعتاد عليها جمهورها، قائلة: مساء الفل والهنا والسعادة والحب والقوة وكل حاجة حلوة، الجملة دي وحشتني.. بقالي سنة ما قلتهاش، سنة كنت واخدة فيها استراحة محارب.

وأضافت رضوى متأثرة: بس هو نفس الرعب ونفس الرهبة ونفس الإحساس.. لما قررت أرجع مكنتش عارفة هرجع بإيه، وهرجع إزاي، وهقول إيه.. لأن الإعلام رسالة، ورسالة مهمة وقوية، وبشوف إن الشاشة دي ممكن تحط البني آدم في حتة كويسة لو التأثير كان إيجابياً.

وتابعت: مافكرتش لوحدي، ومخططتش لوحدي، ومنفذتش لوحدي.. فريق كبير من أصغر حد لأكبر حد شارك في التطوير ده، كنا كلنا بنفكر إزاي نرجع، ونقدم محتوى يساعد الناس على أن تتفادى الأخطاء، إزاي نخليكِ تتعلّمي من تجارب غيرك من غير ما تدخلي فيها.

"سامحوني لو صوتي بيرعش".. 10 أعوام من العلاقة مع الجمهور

واصلت رضوى حديثها بتأثر واضح: سامحوني لو صوتي بيرعش، بس أكيد اتعودتوا عليَّ بقالي 10 سنين.. الحقيقة إللي ورا الكاميرا أهم بكثير من إللي قدامها.. لأنه في ناس كثير جدًا تعبت علشان توصلوا للّي هتشوفوه النهاردة.

"هي وبس".. قصص من الواقع بطرفيها

كشفت رضوى عن طبيعة الفقرات الجديدة، ومن بينها سرد قصص مستوحاة من أحداث حقيقية تقوم بتنفيذها من خلال توظيف تقنيات الذكاء الاصطناعي في سردها فضلاً عن استضافة أصحاب القصة الحقيقية.

وقالت رضوى عن تفاصيل الفقرات الجديدة هذا الموسم: إللي هتشوفوه في البرنامج ده قصص حقيقية، ومش من طرف واحد.. من الطرفين، علشان يمكن متغلطيش نفس الغلطة، أو متوقعيش في نفس الفخ.. يمكن القصة تصلح، يمكن في أسرة تتفرج وتشوف إن إللي ابتدوا فيه ينهوه بسرعة قبل ما يحصل طلاق أو انفصال.

قصة سونيا وصفوت.. الحب الزائف والانكسار

استعرضت رضوى الشربيني في الفقرة الأساسية من الحلقة قصة حقيقية بعنوان "سونيا وصفوت"، قائلة: سونيا بنت زي أي بنت.. كانت عاوزة تتجوز عن حب، لكن تحكمات أهلها خلّتها تفكر تهرب من البيت بأي طريقة، فوافقت على أول عريس جالها، إللي كان صفوت ابن عمها.

وأضافت: صفوت كان على قده، لدرجة إنه والدها جابله الشقة إللي عاشوا فيها في شبرا الخيمة، وسونيا باعت شبكتها علشان يفرشوا البيت.. عدت سنتان تقال، بس كانت بتحاول.

وتابعت: في يوم، صفوت عمل حادثة كبيرة، وقال بعدها إنه هيسيب الشغل ويفتح ورشة مع جارته وزميلته صباح.. سونيا دعت له، لكن الأحوال ما اتحسنتش.. وصفوت بقى دائمًا بيقول: مفيش فلوس، أكثر من سلامو عليكو.

الشكوك والانفجار.. عندما اكتشفت الخيانة

روت رضوى تطورات القصة: واحدة من بناتها تعبت، وسونيا باعت آخر قطعة دهب علشان تعالجها.. وقتها قررت تفتح محفظة صفوت، لقتها مليانة فلوس مطبقة، وكان بيخبيها عنها.

وأضافت: وفي يوم، جارتها الكبيرة إللي بتحبها، خبطت عليها بالليل، وفضلت تسألها عن صفوت، وسونيا استغربت وسألتها عن سبب الزيارة.. قالت لها: أنا جاية أقولك إنه جوزك صفوت متجوز عليكِ صباح.

واستطردت رضوى: إللي سمعته كسرها، مبقاش جواها غير سؤال واحد بيتكرر: ليه يا صفوت؟ عملت فيك إيه علشان تعمل فيا كده؟ ده أنا وأهلي شيلناك من على الأرض شيل.

الطلاق والنفقة والسجن

تابعت رضوى: سونيا فكرت وقررت تطلب الطلاق، وبالفعل حصلت على الطلقة الثالثة والأخيرة، ولأنه مبقاش بيصرف، قررت ترفع عليه قضية نفقة.. لكنه قعد سنتين ما بيدفعش، لحد ما سجن واضطُر يدفع، لكن بعد خروجه لسه ما بيدفعش ولا بيصرف على بناته.

واختتمت حديثها: دي كانت حكاية سونيا، واحدة من قصص كثير هتشوفوها في الموسم الجديد من هي وبس.

نبذة عن البرنامج ومسيرته

يُذكر أن الإعلامية رضوى الشربيني بدأت مشوارها الإعلامي مع برنامج "هي وبس" عبر شاشة CBC سفرة، وحققت من خلاله نجاحًا واسعًا، إذ قدمت فقرات متنوعة تناولت قضايا المرأة، ونصائح من متخصصين، إلى جانب تسليط الضوء على الموضة والتطورات الحديثة.

ويعد الموسم الماضي، التاسع، هو آخر موسم عُرض من البرنامج قبل توقفه، ليعود، الآن، بحلة جديدة عبر شاشة DMC.

لايف ستايل على مدار الساعة