تطورات الحالة الصحية لياسمين غيث بعد جراحة إزالة الورم السرطاني

كشفت الصفحة الرسمية للفنانة ياسمين غيث، عن تطورات الحالة الصحية لها بعد خضوعها لجراحة إزالة ورم سرطاني، مؤكدة أن الجراحة تمت بنجاح ولكن ياسمين لا زالت في غرفة العناية المركزة، وطلبت من كل المتعاطفين معها تكثيف الدعاء، حتى تتعافى بشكل كامل من أزمتها الصحية.

وكتب المشرف على صفحة ياسمين غيث، على موقع الفيس بوك: 'ياسمين خلصت العملية الحمد لله بنجاح، برجاء الدعاء بتمام الشفاء والتعافي والخروج من العناية المركزة والمستشفى على خير يا رب إن شاء الله.. شكراً لكل من دعا لها'.

وكانت ياسمين غيث، قد ودعت محبيها قبل ساعات قليلة من الخضوع للجراحة التي أجريت بالأمس، وكتبت عبر حسابها على الفيس بوك، قبل دخول غرفة العمليات: «أنا داخلة أعمل عملية كبيرة ودقيقة.. 8 الصبح بإذن الله العملية.. بايته في المستشفى من النهاردة.. مش عارفة هعرف أرد عليكم وأرجع لكم تاني امتي».

تابعت: «عارفة إنكم في ضهري من غير ماطلب... بس لو في يوم كنت مصدر أمل أو أي نوع من أنواع السعادة ليكم... محتجاكم النهاردة قوي تكونوا كدة ليا... سامحوني لو زعلت أي حد فيكم في يوم من الأيام، عمري ما كنت أقصد أزعل حد... وأنا مسامحة أي حد زعلني أو أذاني بقصد أو بغير قصد... بحبكم قوي وبتمنالكم زي ما بتتمنولي».

ياسمين غيث: استودعتكم الله الذي لا تضيع عنده الودائع

أضافت ياسمين غيث: «استودعت نفسي وابني وجوزي وأخويا وأمي وأبويا وأهلي كلهم وأصحابي الله الذي لا تضيع عنده الودائع... استودعتكم كلكم الله يا ضهري وسندي وعيلتي الكبيرة قوي التانية الذي لا تضيع عنده الودائع.. استودعت الله بيتي و كل حاجة في حياتي الذي لا تضيع عنده الودائع.. استودعتكم الله الذي لاتضيع عنده الودائع».

وسبق أن كشفت ياسمين غيث، تفاصيل خمس سنوات من معركتها مع مرض السرطان، مؤكدة أنها حققت الانتصار حتى الآن، ولكن لا يمكنها إعلان التعافي نهائياً إلا بعد مرور عامين كاملين، لأن بروتكول العلاج الخاص بها يمتد لسبع سنوات كاملة، ولسوء الحظ أصابها المرض مجدداً قبل شهور قليلة من انتهاء بروتكول العلاج.

ياسمين حفيدة الفنان الراحل عبدالله غيث أوضحت في منشور عبر حسابها الرسمي بموقع إنستغرام، أنها أصيبت بالمرض اللعين لأول مرة عام 2016، وروت قصتها مع رحلة العلاج قائلة: «الحمد لله، 5 سنين سرطان، حياة على كف عفريت زي ما بيقولو لمدة 5 سنين... إللي اتقال لي إن أول 5 سنين همه أكتر 5 سنين critical ولازم نتابع علشان الـcancer ما يرجعش، لسه مش مصدقة، مش عارفة حصل إزاي... صعب وعدوا بصعوبة... قوي... ولسه لغاية دلوقتي بفتكر، بنهار، بحلم بكوابيس إنه رجع تاني وبصحي أصرخ وأعيط وأقول مش عايزه يحصل لي كدة تاني والنبي يا رب».

وأضافت: «بخاف، بعمل check up كل 6 شهور، and it never gets easier... كل مرة نفس الإحساس ونفس الخوف، عدم إحساس بالأمان إللي كنت حاسة بيه زمان وواخداه for granted، كل مرة الدكتور بتاعي يقول لي ماتخافيش، لو عدا أول خمس سنين من غير ما ييجي تاني يبقي بإذن الله مش هييجي تاني، وجه اليوم ده، بعد خمس سنين، من يوم 6/9/2016...اليوم إللي عرفت فيه إني عندي سرطان واليوم إللي عملت فيه العملية».

وتابعت: «عديت بحزن، ألم، وقت صعب، جنان وتشتت، عدم سيطرة على مشاعري وتصرفاتي، فقدان أمل، كره، حب، فرحة، تغيير، خناق، زعل، ناس بعدت... قوي، وناس تانية قربت، وناس قربت وبعدين بعدوا، عصبية، غضب، عدم تقبل لنفسي، أرق وعدم راحة، إحساس إني حد ماعرفوش إتغيرت، بقيت أوجع وعندي ألم أكتر بس أقوى وواثقة من نفسي أكتر، بقيت بساعد غيري وبدي اللي حواليا أمل».

وواصلت ياسمين: «حبيت كل حاجة أكتر من الأول ومسكت في الحياة أكتر وابني روح قلبي كان أملي إني أكمل وأعيش علشان مكنتش قادرة أقبل فكرة إني ماشوفوش بيكبر، ألف حمد وشكر ليك يا رب عدد كل حاجة خلقتها، مهما شكرتك وحمدتك وعملتلك، عمره ما هيبقى كفاية! شكراً إني لسه عايشة وبعافر... شكراً على أكبر نعمة في حياتنا، اللهم ديم علينا جميعا يا رب نعمة الصحة».

لمشاهدة أجمل صور المشاهير زوروا 'إنستغرام سيدتي'.

وللاطلاع على فيديوجراف المشاهير زوروا 'تيك توك سيدتي'.

ويمكنكم متابعة آخر أخبار النجوم عبر 'تويتر' 'سيدتي فن'.