بالفيديو - ياسر جلال يعلن سبب عدم ظهوره في البرامج: الفن ليس حراماً

ياسر جلال

خلال لقائه مع الإعلامي رامي رضوان في برنامج مساء DMC، الذي يقدمه على قناة dmc، كشف الفنان ياسر جلال عن معايير اختياره لأعماله الفنية، مؤكدًا أنه لا يتحمل عنصر الفشل، بجانب الحديث عن تعاونه مع مي عمر وداليا مصطفى في مسلسله الرمضاني 'علاقة مشروعة'.

وقال ياسر: 'أنا بيهمني أنقي عمل حلو وكل أعمالي الأخيرة الحمد لله ربنا كرمني وفيها حاجة تتشاف، وأنا بختار أعمالي تكون فيها دراما قوية والحدوتة يكون فيها تصاعد وصراع لأن لازم يحصل صراع ويتبني عليه أحداث'.

وواصل: 'فيه أعمال أفكارها غريبة وأنا مش بحبها، أنا بحب الحاجات اللي اتربينا عليها، والمجازفة بالنسبالي محسوبة؛ وبخاف أفشل لأني معنديش فرصة للتعويض، مبقاش في عمري الفني بقية كبيرة، ولكن أنا بردو شخص رومانسي وبحسب كل شيء بالعاطفة وفي نفس الوقت فيا طابع شرقي'.

كما تطرق للحديث عن تعاونه مع مي عمر وداليا مصطفى في مسلسل 'علاقة مشروعة'، قائلاً: 'مسلسل ممتع للجمهور وبيناقش موضوع مهم وفيه من الواقع كتير، ومي عمر هتكون مفاجأة وبتعمل دور يخض وأنا نفسي كنت مخضوض منها وأنا بمثل معاها، وكمان داليا مصطفى دورها في علاقة مشروعة هيكون ميلاد جديد لها'.

وعن سبب ابتعاده عن الظهور في لقاءات تلفزيونية، قال: 'بيجي لي دوخة لما بطلع في أي برنامج وبكون مش مرتاح وطاقتي كلها بتخلص في الشغل ومبعرفش أتكلم عن شغلي'.

وأضاف ياسر جلال: 'بسيب النقاد هما اللي بيتكلموا وبتقبل كل حاجة؛ لأن مفيش حد كبير على النقد، واللي بيزعل من النقد ميبقاش تحت الضوء، وأهم شيء تكون راضي وضميرك مرتاح'.

وأكد فخره لانتمائه للوسط الفني قائلًا: 'أنا فخور إني بنتمي للوسط الفني وإحنا على عكس ما الناس بتشوفنا وممكن زميل يتفهم غلط في مكان أو مناسبة وشغلنا متعب جدا ومش بنقصد نعمل حاجة غلط، وزمايلي بيتعرضوا لهجوم شديد'.

وأضاف: 'بستغرب من الهجوم على بعض الفنانين فلو حد منهم أخطأ في شيء معين بقول له هل نسيت تاريخه؟ ولو تعثر بلاش تدبحه وأقف في ضهره وبلاش انتقاد بتجريح وتموت الفنان ليه؟ فين التسامح والحب؟ الفنان لازم يكون مقدر أكتر من كدا، الفنانين بيسعدونا والفن شيء عظيم ومش حرام دا رسالة قوية جداً'.