بالفيديو - حميد الشاعري يعلّق على أزمة نجله مع حلمي بكر ويوجّه نصيحة لعمر مصطفى

حميد الشاعري

حلّ الفنان حميد الشاعري ضيفاً على برنامج 'حبر سرّي' الذي تقدّمه الإعلامية أسما إبراهيم على قناة 'القاهرة والناس' حيث تحدث عن عدد من القضايا المطروحة على الساحة حالياً، وكشف عن سبب خلاف نجله نديم مع الموسيقار حلمي بكر، وغضبه من الهجوم على أكرم حسني بسبب أغنية 'للي' التي قدّمها محمد منير، وأبدى رأيه في ويجز وأغاني الراب والمهرجانات، كما وجّه نصيحة للملحن عمرو مصطفى في أزمته الأخيرة مع الفنان عمرو دياب.

وقال حميد الشاعري: 'أنا كنت في عزل طبي لمدة أسبوع بسبب كورونا، ولقيت فيه حوار فجأة وأنا بحب حلمي بكر جداً، وعملنا الحلم العربي مع بعض، وكانت ظاهرة مش هتتكرر تاني، ومش عارف إيه اللي حصل، وقلت لنديم يمسح المنشور وحاولت أفهمه إن حلمي طبعه كدا من زمان واتعودنا عليه'.

وأضاف: 'لكن المرة دي أنا مش عارف حلمي ليه بيهاجمني؟ ولكن ممكن يكون السبب هو اختلاف الأجيال ما بينه وبين نديم ابني، ومع ذلك مفيش بيننا أي مشاكل أو أزمات نهائياً، هو صديق مقرب وأكلنا وشربنا مع بعض ودخل بيتي'.

واستطرد الشاعري قائلاً: 'أنا عمري ما توسطت لنديم ابني عشان يشتغل مع عمرو دياب في أغنية ملاك الحسن؛ لأنه متربي على إيد عمرو دياب من صغره، بخلاف إنه عنده رأيه وحياته ومش بتدخل فيها، وأنا ربيت ولادي من صغرهم على الاستقلالية من سن 14 سنة، ونديم مستقل وله قراراته الخاصة من ساعتها'.

وعبّر الشاعري عن غضبه الشديد بسبب أزمة الفنان أكرم حسني وتشابه أغنيته مع الفلكلور، حيث قال: 'الفلكور دا كارثة كل واحد بيغنيه بيفتكره بتاعه ومفيش أزمة أصلا؛ لأن الفلكلور ملك للجميع وتراث، إحنا بنعمل أغنية مش ذرة عشان نقول لجنة استماع ونعمل مشاكل.. ليه كل دا؟ وأكرم حسني مغلطش لما كتب اسمه على فلكلور أغنية للي، وهو فنان مبدع والأغنية هي اللي بتعيش مش الفنان... كفاية نحطم في الناس'.

وعن رأيه في مطرب الراب ويجز والانتقادات التي يتعرض لها، قال: 'ويجز مشروع غنائي متكامل، وبنصحه يكمل وبحبه جداً، وممكن يبقى زي عمرو دياب ومحمد منير، ومش معنى إن فيه بعض الناس مش فاهمين كلامه إنهم مش هيحبوه، بالعكس لازم يسمعوه ويشوفوا بيقول إيه'.

كما وجّه الشاعري رسالة الى الملحن عمرو مصطفى بشأن خلافه مع عمرو دياب، قائلاً: 'مبحبش أتدخل في المشاكل لأن عمرو مصطفى وعمرو دياب صحاب من 20 سنة، وبقول لعمرو مصطفى أمسك نفسك شويةـ أنت طيب أوي واللي في قلبك على لسانك، بس مينفعش ولازم تعمل حساب فرق التاريخ والسن بينك وبين عمرو دياب'.

وعن انتشار المهرجانات الشعبية والراب، قال حميد الشاعري: 'أنا متقبل المهرجانات والراب بطريقة كبيرة وبحبهم لأنهم مختلفين ودا أهم شيء والتنوع الموسيقي حلو، وعملت أغنية راب مع مروان موسى، ولازم نخلي الشباب يبدعوا وأنا ضد المنع لأن الحاجة الحلوة هتسمعيها معجبتكيش ممكن تقفليها والموضوع بسيط.

وأضاف: 'المهرجانات هي تطور للأغاني الشعبية، وأي شكل غنائي جديد في البداية الناس مش هتستوعبه ودا طبيعي، ومفيش حاجة اسمها أسوأ لحن أو أسوأ أغنية بالعكس لازم نحاول نفهم الأغنية رسالتها إيه؟ زي أغنية 'حدوتة مصرية' لمحمد منير عبارة عن خبط بس ومفيش لحن ومع ذلك الفكرة عجبتني وكانت رائعة'.