شريف منير عن فيلم "ريش": قذارة رهيبة.. وهالة صدقي: ضايقني

كشف الفنان المصري شريف منير عن سبب انسحابه من مشاهدة فيلم 'ريش' الذي عُرض في مهرجان الجونة السينمائي، مشيرًا إلى أن ما تضمنه 'قذارة رهيبة'.

وأضاف منير في تصريحات تلفزيونية: 'اللي شفته في الفيلم كان مخلي شكلنا مش حلو. أسرة عايشة في عذاب غير طبيعي بشكل مؤذي وقذارة رهيبة، واتخنقت من الفيلم، لأن العشوائيات اللي كانت موجودة مكنتش عايشة كده'.

وأوضح الفنان المصري بأن قاطني العشوائيات أصبحوا يعيشون في أماكن متطورة ونظيفة وبيوت مفروشة، معلقًا 'بلدنا فيها أشكال ومناظر حلوة، لكن حياة العشوائيات ماكنتش بالمنظر ده، الصورة اللي كنا بنشوفها أيام حين ميسرة والحاجات دي العين لازم تبعد عنها بقى، إحنا بقينا في جمهورية جديدة وشكل جديد'.

وأشار إلى أنه التقى بمنتج الفيلم محمد حفظي، وقال له إن 'ريش' أغضبه: 'قلت له مش شايف أي إبداع في الفيلم، والناس اللي بتمثل مش ممثلين، والفيلم بيفكرني بفيلم بداية ونهاية للراحل صلاح سيف لكن مكنش بالأذى الفظيع ده'.

وتابع حديثه: 'حفظي نفسه قالي أنا عارف إن الفيلم يخنق ومتعب وناس كتير تعبت منه'، مشددة على أنه لم يعد مثل هذه الصور المؤذية في مصر.

ولفت شريف منير: 'الفيلم مكنش كده، وأتمنى الناس تشوف فيلم ريش وتقول رأيها، ورغم إني لسه مروحتش بيتنا اتصل بيّ عدد كبير من الصحف ووسائل الإعلام كأن الدنيا اتقلبت وكأني أنا اللي خرجت لوحدي'.

من جهتها قالت الفنانة هالة صدقي، إن فيلم 'ريش' من وحي الخيال وليس واقعيا، لاسيما وأن أماكن تصويره لم تتم داخل مصر، مضيفة: 'بتحس إنك بتتفرج على فيلم بلجراد في ألمانيا قبل الحرب العالمية التانية'.

وأوضحت هالة صدقي، في تصريحات تلفزيونية: 'الناس في الفيلم مش نضاف والفلوس حتى قديمة، والسجاير موجودة وثابتة في كل مشاهد الفيلم، ولهذا الفيلم مثل اللوحة التجريدية، ولكننا علشان متحمسين لمصر والدفعة الكبيرة فيها نرفضه، والفيلم عرض منذ 4 سنوات، ونحن قبل 4 سنوات من الآن لم نتوقع التطور الكبير في مصر والطفرة الكبيرة التي حدثت في وقت قصير'.

وبينت صدقي: 'أنا بدخل بيوت فقراء كتير جدا وبيوت الناس جوه زي الفل، وده اللي ضايقني من الفيلم، وما عنديش مشكلة في الفقراء ولكن المشكلة بظهور حد قذر مش فقير، وكان يجب إظهار الصورة الحقيقة في مصر'.

وأكدت: 'حصل امتعاض شديد جدا من كل الزملاء والحاضرين بعد مشاهدة الفيلم لأن مصر مش كده، وكان رد الفعل تلقائى من الناس في الجونة'.

يذكر أن 'ريش' حائز على الجائزة الكبرى لمسابقة أسبوع النقاد بمهرجان 'كان' السينمائي الدولي.

الفيلم من إخراج عمر الزهيري، وكان وراء تتويج السينما المصرية للمرة الأولى في تاريخها بجائزة من مهرجان 'كان' عن عمل فني محدد. وشهد مهرجان 'الجونة' عرضه الأول.