حسين فهمي: الناس تحمست لضوابط الزي في مهرجان القاهرة.. لازم يبقى شكلنا جيد ولبسنا محترم

واصل النجم حسين فهمي رئيس الدورة 44 من مهرجان القاهرة السينمائي الدولي دفاعه عن الضوابط التي وضعها على النجوم لحضور فعاليات المهرجان.

قال حسين فهمي: 'كل الناس تحمست وسعيدة جدًا بالضوابط اللي حطيناها، وأنا هدفي إن لازم يبقى شكلنا جيد ولبسنا محترم، لأننا ناس محترمة فلازم نقدم هذا الاحترام للعالم'، حسب تصريحاته لبرنامج 'ET بالعربي'.

وأضاف: هناك dress code في العالم كله لازم يطبق على الناس ومش شايف دي حاجة تزعل لما أقول عايز شكلنا يبقى حلو، ومش بقول ما نلبسش كويس لكن نلبس شيك إحنا مش في ديفليه.

يذكر أن الفنان حسين فهمي رئيس مهرجان القاهرة السينمائي الدولي كان قد أعلن عن تحديد شكل الزي الرسمي في دورة المهرجان الـ 44 المنتظر إقامتها في الفترة من 13 إلى 22 نوفمبر المقبل.

وقال حسين فهمي إن مهرجان القاهرة السينمائي الدولي ضمن مهرجانات الفئة الأولى، موضحا: 'لما جيت المهرجان لقيت أن كل واحد بيلبس اللي هو عايزه، أنا لما حد بيجيلي البيت مش هستقبله بالبيجاما، هلبس كويس والستات تلبس لطيف'.

أضاف رئيس المهرجان: 'للأسف الشديد الأمر تطور لأكثر مما كنت متخيل، وبقى (وريني يا حبيبتي الفستان طيب لفي كده.. مين اللي عامل التسريحة واسمه أيه الكوافير؟)، مش ده المهرجان'.

وأكد حسين فهمي: 'لازم كلنا نبقى ملتزمين بالملابس الرسمية بتاعة كل المهرجانات الدولية، ألان ديلون لما جه المهرجان كان جاي بالبدلة السموكنج على كتفه، ده عادي واللبس اللي إحنا بنتفق عليه دوليا'.

واختتم رئيس مهرجان القاهرة السينمائي الدولي تصريحاته قائلا: 'نفس الزي الرسمي هيبقى موجود، والناس هتلبس كويس وتبقى شيك وهيبان إنه مهرجان قيم جدا'.

ويكرم مهرجان القاهرة السينمائي الدولي في دورته الـ44 كلا من الفنانة لبلبة بجائزة الهرم الذهبي لإنجاز العمر، المخرجة كاملة أبو ذكري بجائزة فاتن حمامة للتميز، إلى جانب تكريم خاص للمخرج المجري بيلا تار عن مشواره الفني وكذلك اسم المخرج الراحل علي عبد الخالق.

حمل آبلكيشن FilFan ... و(عيش وسط النجوم)