إلهام شاهين: أول مرة أقف قدام الكاميرا كانت قدام عادل إمام

هنأت الفنانة المصرية إلهام_شاهين، النجم المصري الكبير عادل_إمام، بمناسبة عيد ميلاده الذي وافق يوم ١٧ مايو/آيار.

نشرت إلهام مقطع فيديو تحدثت فيه عن فضل عادل إمام في وضعها على بداية سلم النجومية، وكواليس تصوير أولى أعمالها السينمائية معه.

قالت إلهام: 'كل سنة ونجم نجوم مصر الفنان الكبير زعيم الفن عادل إمام طيب وبخير، بحبك من كل قلبي يا عدولة ولا أنسى فضلك علي أبدا'.

أضافت: 'أول مرة في حياتي أقف أمام كاميرا وأول فيلم وأنا في سنة أولى معهد فنون مسرحية كان فيلم أمهات في المنفى بطولة عادل إمام. كان عندي 3 أو 4 مشاهد قدامه وكنت فرحانة جدا بيهم والباقي أمام ممثلين آخرين، ويمكن أول مشهد أصوره كان معاه، وكانت إسكندرية كلها سامعة دقات قلبي'.

تابعت: 'بعد تخرجي مباشرة رشحني النجم الكبير عادل إمام وإداني فرصة عمري في فيلم الهلفوت مع العمالقة وحيد حامد والمخرج سمير سيف، ودور زي دا كان حلم حياتي، ونقلة كبيرة خلقت اسم إلهام شاهين ووضعتني في مكان من النجومية واختصرت لي سنين كتير. وبعد الهلفوت بقى ينصحني لا أقبل أي حاجة ويقوللي إنت ممثلة جامدة، وكانت أول جايزة في حياتي كأحسن ممثلة في الهلفوت'.

اختتمت: 'لما عملت مع الفنان الجميل عادل إمام فيلم رمضان فوق البركان سألني ليه قبلت الدور دا، ممكن أي حد يعمله وإنت إمكانياتك أكبر، فاستغربت لأنهم لو قالولي امشي قدام الكاميرا في عمل مع عادل إمام هوافق، ولا أنسى كلامه ورأي نجم زيه إداني ثقة كبيرة في نفسي والمستقبل'.