بالفيديو - فاطمة عيد تكشف أسرار زواجها على ضرة وعلاقتها بها

فاطمة عيد

حلت الفنانة فاطمة عيد ضيفة على برنامج 'كلم الناس' الذي تقدمه الإعلامية ياسمين عز على قناة mbc مصر، حيث كشفت خلال اللقاء العديد من أسرارها الشخصية وكيف حاربت عائلتها لتتزوج من الرجل الذي أحبته رغم أنه كان متزوجاً وله أولاد، كما كشفت عن سبب غيابها عن الوسط الفني خلال الفترة الماضية، بجانب الحديث عن أمنيتها بإنجاب ولد وتفاصيل علاقتها مع زوجها.

وقالت فاطمة عيد: 'أنا مش قصدي أبعد عن الفن، ولكني زعلانة على الوسط الفني لأن الفنان بقى مظلوم، وأنا هرجع قريب لأن ليا محبين من جميع الأعمار'.

وواصلت: 'بحب أخد رأي جوزي في كل حاجة، ودا مش تحكم ولكن مفيش حد هيخاف عليا أكتر منه، وهو مؤلف وملحن وإنسان متعلم ومثقف وبلجأ له، وأول ما أتقابلنا حسيت إني هتجوزه وقولتله، وكان فاكر إني بهزر لأنه كان متجوز وعنده أولاد وأكبر مني، ولكن بالفعل قعدنا نتكلم سنتين وبعدين اتجوزنا'.

أما عن أمنتيها في إنجاب ولد، علقت فاطمة عيد قائلة: 'كان نفسي أخلف ولد وكنت بكلم ربنا وأدعي له، بس فهمت أن محدش يقدر يعاند مع ربنا ورزقني بأربع بنات، وأزواجهن بعتبرهم ولادي وبقول الحمد لله وراضية، واقتنعت أن مفيش فرق بين الولد والبنت'.

وأكدت فاطمة عيد أنها تحيي بعض حفلات الزفاف دون مقابل لأنها تحب مجاملة المقربين منها، كما أنها غرست في بناتها هذه القيم، منها حب الغير والمجاملة والمواظبة على الصلاة، قائلة: 'اللي بيقرب من ربنا الناس بتحبه، وأنا وعائلتي بنصلي جماعة دائماً، ومش بنضيع أي فرض، وبنتي لم تعتزل الغناء، ولكن مفيش عمل مناسب'.

وقالت: 'جوزي ميقدرش يتجوز عليا.. هو أنا أي حد؟ دا أنا راهنت على زواجي منه بالرغم من إنه متجوز، وكسبت عائلته لأن ربنا راضي عني حتى ضرتي أقنعتها إن أنا وزوجها مكتوبين لبعض ودي إرادة ربنا'.

ورد شفيق الشايب، زوج فاطمة عيد على تصريحاتها حول قصة حبهما، وذلك في مداخلة هاتفية، قائلا: هو مين مبيحبش فاطمة؟ دي فيها كل حاجة زي الأخلاق والجمال والطيبة والفن الجميل وحب الناس، وقلبها أبيض والعالم كله بيحبها لأنها طيبة جداً ومحترمة وزوجة فاضلة، وأول ما شافتني سهم الحب ضرب في قلبها وأخدنا أرقام بعض، وبقينا نتكلم وبعدين اتجوزنا'.

وتحدثت عن علاقتها بضرتها، مشيرة إلى أن علاقتهما كانت جيدة وكانتا مثل الأخوات، على الرغم من أنها تزوجته كزوجة ثانية ولديه أبناء من ضرتها.

وقالت: 'بعد الزواج أهل زوجي رضيوا عني كل الرضا، وصاحبت ضرتي، بقيت أنا اللي بكلمها وعاوزه أي حاجة ألبيها لها، الجواز والرزق في عمر الغيب ومكتوب، وحبتني أكتر من نفسها، فالجواز والعمر رزق ومكتوب وإحنا مكتوبين لبعض حتى لو زعلتي زعلك مش هيفيد خلاص الفأس وقعت في الرأس لا مفر، وكل حاجة مكتوبة عند ربنا'.

وأضافت: 'كسبتها بمعاملتي الحلوة إحنا أخوات والجواز قسمة ونصيب وكل حاجة بتاعة ربنا وربنا اللي نفذ وجوزي انبسط لما شفنا كويسين مع بعض انبسطت أني قدرت أخليها تحبني وأحبها ما كنتش مرسومة'.