حمو بيكا يخرج عن صمته… ويوجه رسالة لـ هاني شاكر‎‎

أقدم مؤدي المهرجانات حمو بيكا على تعديل تعليق كان قد أرفقه مع صورة نشرها تزامنا مع تقديم نقيب المهن الموسيقية هاني شاكر استقالته.

وكان حمو بيكا علّق على تلك الصورة بالقول: 'لكل باب اتقفل في وشي انا راجع اشتري العمارة'، لكنه استبدلها بآية قرآنية.

وأثار تعليق حمو بيكا جدلا كبيرا؛ ما دفعه للرد على الانتقادات التي طالته من خلال خدمة البث المباشر عبر صفحته الرسمية على فيسبوك، حيث عبر عن حزنه لاستقالة الفنان المصري هاني شاكر من منصبه كـ'نقيب للمهن الموسيقية'.

وقال: 'هاني شاكر راجل مقامه كبير، على دماغي، وبحبه، ومفيش بيني وبينه أي مشكلة، وكنت زعلان إنه قدم استقالته، مع إني مش شغال في مصر وموقوف، ولكني مش زعلان'.

وأشار حمو بيكا في حديثه إلى أن التعليق 'أنا راجع يا شوية جواجع'، هو عنوان لأغنيته المقرر طرحها قريبا.

وقال: 'هاني شاكر أخويا الكبير، وبنتشرف بيه في كل حتة ده أمير الغناء.. أنا نزلت صورة مكتوب عليها (أنا راجع يا شوية جواجع)، ودي أغنية جديدة مع نور التوت وحمو الطيخة، لكن الناس فهموا غلط، وحرَّفوا كلامي، والدنيا قلبت، مش كل حاجة تعملوا منها فيلم، فيه إيه يا جماعه، وأنا مش مستحمل والله العظيم تلاتة، كل واحد فيه اللي مكفيه، أنا راجل موقوف ومش معايا الكارنيه، لكن راضي بحكمة ربنا، وألف شكر ليك يا رب إني عايش وماشي على رجلي، وأنا علاقتي بهاني شاكر جيدة، ولا توجد أي خلافات بيننا'.

ووجه حمو بيكا كلامه للفنان المصري هاني شاكر من خلال البث المباشر: 'أنا أخوك الصغير، وبحبك، ومفيش بيني وبينك أي حاجة، وقدَّرني زي ابنك، وأنا مش عاوز حاجة، ومش عاوز أخش النقابة، أنا بس حبيت أوضح حقيقة تصريحاتي للجمهور، ولكل الناس اللي فهمت غلط، وإني مش قصدي أي إساءة'.

وأضاف: 'أنا محدش ليه دعوه بيا، وأنا بعلن عن أغنية لسة حتنزل، وهو أنا مفيش غيري، وسايبين الدنيا كلها، ومركزين فيا، سيبوني في حالي، أنا لم أقصد هاني شاكر بأي شيئ، ليه بتوصلوا لللناس إن احنا صيع وملناش أهل، حسبي الله ونعم الوكيل في كل واحد بشمت بالناس، سيبوا الملك للمالك'.