أسما شريف منير تكشف كواليس زواجها الثالث (فيديو)

احتفلت الإعلامية أسما شريف منير بزواجها بالفنان أحمد شامل عزمي، في حفل بسيط اقتصر على حضور الأهل والأصدقاء المقربين.

وشاركت أسما جمهورها تفاصيل الزفاف وتطورات حياتها الجديدة في بث مباشر عبر حسابها الرسمي على منصة 'إنستغرام'، كشفت خلاله عن الكثير من المشاعر والدروس التي تعلمتها في السنوات الماضية.

أسما شريف منير، التي خاضت تجارب شخصية متقلبة، ظهرت في البث المباشر أكثر نضجًا وهدوءًا، مؤمنة بأن السعادة الحقيقية لا تُقاس بحجم الاحتفال ولا بكثرة الصور، وإنما بالتفاهم والنية الصادقة، وبأن الدعم النفسي والاستقرار العاطفي أهم من المظاهر.

أسما شريف منير: أول مرة أحس إني عروسة

بدأت أسما حديثها قائلة: دي تالت جوازة ليا، بس أول مرة أحس إني عروسة بجد.. دايمًا كنت بتعرض لتعليقات سلبية وانتقادات الناس كانت بتدخل تشتم وتتريق، لكن المرة دي الحمد لله، ردود الأفعال مش طبيعية ومش مستوعبة اللي بيحصل، حسيت إن ربنا واقف في ضهري، وإنه لما بيحب حد بيحبب فيه خلقه.

وتابعت: اتعلمت كتير من تجاربي، وبقيت إنسانة مختلفة. بقيت أقدر الخصوصية، وأداري على حياتي لحد ما تكتمل على خير، كنت زمان بعيش حياتي على السوشيال ميديا، لكن دلوقتي عرفت قيمة الكتمان.

'مش بالبهجة.. البساطة أحلى'

تحدثت أسما عن اختلاف حفل زفافها الحالي عن زفافها الأول، موضحة: أول فرح عملته كان كبير جدًا وصرفنا فيه فلوس كتير، لكن في الآخر مافدنيش في حاجة، اتعلمت معني البساطة، وإن الستر أهم من المظاهر، وإن مش كل حاجة لازم تتعمل علشان الناس.

وأضافت: الست مش غلط تطلب الجواز، والمطلقة من حقها تبدأ من جديد. لأننا كستات لينا احتياجات طبيعية ومش من العيب نعترف بده، لازم يكون في راجل يشاركها حياتها ويكمل معاها المشوار.

ابتعدت عن السهر والإغواء

بصراحة لافتة، تحدثت أسما عن فترة صعبة مرت بها قبل الزواج، قائلة: كنت بمر بوقت مش متزن نفسيًا، ببكي كل ليلة، وحسيت إن حياتي ماشية في اتجاه غلط. قررت أقطع علاقتي بناس ممكن تشدني لأماكن سهر وشرب، وبدأت أرجع لنفسي وأفكر من جديد وقلت مش عاوزة كده.

وعن علاقتها بزوجها أحمد شامل، قالت أسما: هو مش متزمت ولا بيطلب مني أتحجب، لكنه بني آدم طيب وعايز يعمل حياة محترمة، نيتنا إننا نمشي سوا في طريق ربنا، وده أكتر شيء شدني ليه، ما فكرتش هو معاه كام، ولا هيجيبلي شقة فين.

قصة تعارفها على أحمد شامل: ظهر فجأة.. وغيّر حياتي

استعادت أسما لحظة دخول أحمد شامل حياتها قائلة: ظهر فجأة، كأنه طلعلي من تحت الأرض، وكنت بدعي ربنا يرزقني بزوج صالح، قابلته في الشغل وكان جاي يدي ورش، واتعرفنا، ولقيته مختلف عن كل اللي عرفتهم قبل كده.

وأضافت: كان بيرقص رقص معاصر، وكان من أشطر الناس في المجال ده، رجعني لأيام كنت بحب فيها الحياة، بنتعلم مع بعض دلوقتي حاجات كتير، وبينا نية حقيقية إننا نمشي صح.

أحمد شامل: وعدت والدها إني أصونها

من جانبه، سبق أن أعرب الفنان أحمد شامل عزمي عن سعادته وامتنانه بهذه الزيجة، ونشر عبر حسابه الرسمي مجموعة صور من عقد قرانهما، وعلق قائلًا: أنا متشرف جدًا إن أسما مراتي. أهلها ناس طيبين وعندهم إحساس بالبشر، علموني حاجات كتير. بشكر والدها شريف منير على الثقة اللي إداهالي، وبوعده إني هبذل أقصى جهدي علشان أسعدها وأكون عند حسن ظنه.