بالفيديو - عمرو أديب يهاجم محمد رمضان: "متفهمش دماغه فيها إيه"

عمرو أديب

هاجم الإعلامي عمرو أديب خلال تقديمه حلقة من برنامجه 'الحكاية' الذي يقدمه على قناة MBC مصر، الفنان محمد رمضان بعد الفيديوهات التي نشرها وظهر فيها يلقي بأموال في حمام السباحة، عقب صدور حكم بإلزامه بدفع ستة ملايين جنيه للطيار أشرف أبو اليسر، على خلفية تسببه في أزمة أدت لوقفه عن العمل عام 2019.

وعبر أديب عن استيائه من تصرف محمد رمضان والفيديو الذي نشره مؤكداً أنه يستفز جمهوره والشعب المصري، قائلاً: 'كان في قضية بين الفنان محمد مضان والطيار أبو اليسر، الطيار كان رافع قضية عايز تعويض، المحكمة حكمت له بـستة مليون جنيه، وما كان من نمبر وان الأستاذ محمد رمضان غير إنه نشر فيديو مستفز جدا لشعب مصر، قاعد في البيسين بيرمي فلوس أو دولارات في المية، طبعا الدولارات حقيقية أو غير حقيقية دا مش موضوعنا، لكن شيء مستفز، هو بيقولنا إيه الفلوس دي على الجزمة، أن النعمة دي متفرقش معاه أنا الفلوس عندي متفرقش في حاجة'.

وأكد أديب أن محمد رمضان أثار حفيظة عدد كبير من محبيه، ووصفه أنه أصبح عدو نفسه قائلاً 'متفهمش دماغه فيها إيه بيفكر إزاي، عاوزه يشرحلي بيفكر في إيه لو الفلوس متهمكش اتبرع بيها لحد أديها للطيار تعويض عن المصيبة اللي أنت عملتهاله'.

وأكمل موجهاً كلامه لمحمد رمضان قائلا: 'يا نمبر وان أنت مش ملاحظ أن بقالك سنة بتعمل مصايب، بقالك سنة بتطلع من حدوتة لحدوتة والناس اللي أنت استفزتها دي بتبلعلك أي حاجة ويقولوا ميقصدش، المرة دي الناس مش مستحملة أنت في بلد ظروفها صعبة'.

وأضاف: 'أنت ربنا باركلك وبقى عندك فلوس، على فكرة مش أنت بس يا محمد اللي عندك فلوس في ناس عندها ومبيعملوش كده، واللي أدهالك قادر يسحبها منك في ثانية، قبضة واحدة في مرة فجأة كل دا يضيع ويروح، ليه استفزاز الناس، يا محمد اللي كنا بنحسبه موسى طلع فرعون'.

واختتم كلامه قائلاً: 'الناس اللي أنت استفزتهم دول هما اللي عملوك وأنت جزء كبير منك صناعة سوشيال ميديا، وإيه المانع أنك تعتذر للناس وتقولهم مقصدش، يا ابني أهدى وأرجع لعقلك وبلاش غرور ناس كتير أعظم منك وضاعوا في ثواني، شوف خالد النبوي لما تعب شوية مصر كلها واقفة على رجل لأن الناس بتحترمه، حاول تبقى أوعى من كده شوية يا محمد'.