رحلة سريانية إلى معاني القرى والمدن

الإسم هو أوّل انطباع عن هوية المكان والإنسان، وهو خطوة تطوّر لفكرة التملّك،

وهيك صار لمّن تملّك الإنسان القديم المزارع الأرض، بلّش يسَمّي المنطقة التابعة لَإلو لحتى يحدّد ملكيتا وتَبَعيتا. والأسماء الجغرافية (يعني الأمكنة) أقدم من أسماء الأشخاص بسبب هدفها أي الاستفادة من خيراتا حيث إنا مصدر رزق للإنسان.

البداية رح تكون مع إسم سام لأنو نحنا شعوب سامية:

سام: من كلمة شِم shem يللي بتعني إسم بلغتنا الآرامية وبتعني شي إلو قيمة، وبعدنا لليوم منقول فلان إلو إسم يعني إلو قيمة وهو معروف.

بالنسبة لإلنا، أسامينا دايمًا هي أسامي دينية بالعموم لأنو نحنا شعوب دينية وعاطفية متأثرين بالشمس يللي بتعطينا حرارة عاطفية، بينما الشعوب الرومانية متلًا كانت شعوب عسكرية وبالتالي أساميهن بتتمتع بصبغة عسكرية، فَالمدن البريطانية لليوم بتحمل إسم Chester يعني معسكر...

وكانت دايمًا الإمبراطوريات الكبيرة يللي لغتن بعيدة من اللغات السامية بتغيّر أسامي البلاد أو المدن يللي بتحتلّا لتقدر تلفظا برياحة، فَمثلًا إيام الإغريق بالعصر الهلنستي صار إسم:

بيروت: Julia Augusta Felix

بعلبك: Heliopolis

جبيل: Byblos ...

بَس لمّن كانوا يفلّوا من بلادنا كنّا نرجّع الأسامي للغتنا الأساسية. وطبعًا لغتنا الأساسية هيي اللغة السريانية (الآرامية) يللي كانت لغة كل شعوب الشرق وحلّت محل لغات كتيرة منها اللغة الكنعانية (إحدى اللغات السامية) يللي انقرضت حوالى القرن الرابع ق.م.

ومن هالمنطلق منشوف إنو السيد المسيح حكي اللغة الآرامية ومش العبرية يللي هيي لهجة كنعانية.

الأسامي الدينية: كان عنّا قديمًا أهم 4 آلهة

- إله الشمس: قرية مجدل شمس... مجدل: برج وشمس: تعريب لإسم الإله شمش

- إله القمر (سين) Sen: دير القمر... وهو أصلًا إله بابلي قديم وكانت تعبدوه كمان الشعوب السامية والمصرية، وصحرا سينا بتعني صحرا الإله القمر.

- الإله بعل: بعل شمَي يعني رب السما.

- الإله إيل: تعنايل (ܛܥܶܢ ܐܝܠ حِمل الله) ... بدنايل (ܒܝܬ ܕܰܢܺܝܰܐܠ بيت دانيال ... داني: القاضي) حصرايل (مقر أو مسكن الإله إيل)... قرنايل (ܩܪܢܐ ܕܐܝܠܐ قمة الإله)... جبرايل (رجل الله)

أما باقي الآلهة يللي بتجي بمرتبة تانية وتالتة وووو... منن:

تانيت: عقتانيت... عيتانيت... كفر تانيت....

شيما: كفرشيما

عشتار: بعشتار

دد / اَدد : بدادون

صدق: عفصديق

صلم: صليما... بصاليم

رمّان: برمانا

عمّ: كفرعمَيّ

أشمون: أشمونيت ... بشامون

أدون: ربي ومولاي بتسير بالإغريقي أدونيس

كيوان: (كوكب زحل) مراح كيوان

الأسامي الجغرافية: عادةً بتكون وصف جغرافي متل ... رام الله ... رومية يللي بيعنو العلو والإرتفاع أو جباع (إرتفاع)... عمّيق يعني انخفاض عميق ... عاقورة يعني القحط...

أو ممكن يكون الإسم إلو علاقة بظاهرة جيولوجية متل... سهل البقاع (ܦܩܥܬܐ) شق بين جبلين...

وعنا كتير أسامي مركّبة متل:

بيت: في 200 ضَيعة بتبلّش بـ بيت أو بـ

يللي بتعني بلغتنا الآرامية- السريانية ... منزل، مكان، مقام، عايلة، معبد، مركز مقرّ...

ولليوم بعدنا منقول بيت فلان يعني عايلة فلان يللي هيي آل باللغة العربية...

بيت مري: (مري هي جمع مار: سيّد أو والٍ) يعني مقر السيّاد أو القديسين.

بيت شباب: (ش:ساكنة) ومش مفتوحة بس لأنو بالعربي ما في سكون بأول الكلمة حطينا فتحة لمّن

عرّبنا لغتنا... وبيت شباب بتعني مطرح/سكن الجيران.

بيت كوكو: بيت ܟܘܟܐ مطرح الكعك (كعك الحلوة) بمعنى مطرح بيخبزوا في الكعك ...

أو بـ يللي هي اختصار بيت:

برمانا: مقام الإله رَمون.

بكفيا: المكان الصخري.

بتدين: (بيت دينو) مطرح مركز القضاء والحكم (بمعنى محكمة).

بتدين اللقش: يعني الغلّة يللي بتطلع بأول الموسم وكانوا يقدموها قربان للآلهة.

بنشعي: المطرح يللي بنجتمع وبنخبّر الخبريات ومنتساير.

بحرصاف: مطرح البَرَد (المطر المجمّد).

بكركي: مطرح الدفاتر بمعنى الأرشيف (مكتبة).

بزمار: مكان يللي بيغنو فيه (الغناء).

بشري: مطرح البداية يمكن بداية الجبل المقدس- جبل لبنان.

كْفـر: (ك: ساكنة) في 85 ضَيعة بتبلّش بـ كفر يللي بتعني حرفيًا قرية باللغة السريانية.

كفر نون: قرية السمك.

كفر شوبا: (شَوبو) القرية الحارّة (شوب:حَرّ).

كفر بعل: قرية الإله أو الرب أو الرجل.

كفر حباب: قرية الحريق.

بقاع كفرا: سهل القرية (بقاع بتعني سهل أو فجوة بين جبلين).

عيـن: في 60 ضَيعة بتبلش بـ عين يعني نبعة المَي.

عين عار: نبعة شجر الغار.

عين حور: العين البيضا (لون أبيض).

عنجر: (ܓܪܐ) عين مَي سريعة الجريان.

عين كفرا: عين القرية.

عين طورا / عين طورين: عين الجبل / الجبال.

دير: عنا 51 ضَيعة بتبلّش بـ دير...

دير قوبل (فندق / خان)، دير كفيفان (الساجد والمنحني)، دير كيفا (الصخرة) ...

مْراح: (ميم ساكنة) في 25 ضَيعة بتبلّش بـ مراح يعني أرض واسعة بيربوا فيا المواشي أو دود القز.

مراح حوَرتا (الأرض البيضا)... مراح الكيوان... مراح القلود...

راس/راش/رش: في 16 ضَيعة بتبلّش بـ راس يللي بتعني رأس أو قمة.

كيفا (رأس الصخرة)... رشعين (راس العين)... رشميا (رأس الماء)...

مار: في 19 ضَيعة بتبلّش بـ مار ... مار: سيّد وتطلق احترامًا للسيد المسيح والقديسين.

مار موشي (مار موسى)... مَرت شموني... مَرتموره (مرت: سيدة... القديسة)...

مجدل: في 13 ضَيعة باسم مجدل يللي بتعني مطرح عالي للمراقبة متل القلعة.

مجدل بعنا... مجدل معوش... مجدلون...

خربة: في 8 ضيَع... بمعنى القفر والخراب: خربة قنافار (خربة بائع الثمر)...

حوش: في 9 ضيَع... بمعنى حظيرة مسوّرة، حوش حالا...

تل: 13 ضيعة ، ܬܶܠ ، أرض مرتفعة... تل بيري (تل الآبار)

قرنة (قمة): قرنة حمرا مش الحمرا وبتعني النبيد / الخمر ومش يعني لون أحمر.

قرنة سودا: قمة الشهداء ܣܳܗ̈ܕܶܐ (هيي قمة بيضا ومش سودا).

باقي الأسامي

أميون: ون (علامة التصغير باللغة السريانية)... أميون: تصغير أميا يعني القوة والصلابة.

أرزون: أرزة صغيرة.

أرنون: (تصغير أرنو) بمعنى تيس الجبل.

عرمون: (تصغير عَرمو) بمعنى الأرض الوعرة ...

طورزا: جبل الأرز.

طرابلس: (طور بيل) جبل الإله بيل أو بعل..

(س مُضافة للكلمة من التأثير الإغريقي وما بتعني أبدًا تلات مدن باللغة اليونانية متل ما كتار بيفكرو).

إهدن: من إسم الإله أدن - أدون - أدونيس.

أفقا: مطرح ما بتتدفق المَي (المياه) من الصخور... حِمى وملجأ لبعل لبنان أدون.

ميفوق: مطرح ما المَي بتتدفّق... بذات المعنى (أفقا).

إم الرب: إم بمعنى ذات الرب... يعني يللي عندا بعل (رَب)... بنقول إم 44 يعني عندا 44 قَدَم.

فاريا: الفواكه فالوغا: قطعة مجتزئة أو شقفة.

بيروت: ( ܒܪܘܬܐ) صنوبرة... مدينة شجر الصنوبر.

قبيات: مجامع مَي (مياه) قاديش: قديس.

معراب: غرب شحيم: شي أسود.

شبعا: (شفعو) فيض الماء وتدفقه نحلة: أودية.

الشوف: السحر والتنجيم عنايا: مغيّم عاقورة: جرداء.

الناقورة: الحفار غوما: جورة/حفرة جعيتا: صرخة.

جونيه: زاوية أو خليج تحوم: حدود (حدود جبل لبنان).

ديك المحدي: ديك اختصار كلمة دِكتو يللي بتعني مكان... يعني المكان المفرح والمبهج.

لبنان: قلب الإله... قلب الله.