يا معالي وزير الصحة .. حاضنة المولود مش لازم تكون أمنية!
klyoum.com
أخر اخبار الاردن:
لاعب المنتخب العراقي نشأت أكرم .. يثير جدل الشارع الاردنيمعالي الوزير، بنحكي معك اليوم من قلب محروق ومن باب العتاب الصادق، مش من باب المزاودة ولا الهجوم. إحنا بنعرف قديش الحمل ثقيل عليك وبنوثق بجهودك، بس اللي عم بنشوفه وبنسمعه كل يوم على الفيسبوك والتواصل الاجتماعي إشي بوجع القلب، وما يسكت عنه.. موضوع حاضنات أطفال الخداج.
الناس شو عم بتحكي على السوشيال ميديا؟
المنشورات والقصص اللي بتنزل يومياً بتشيب الراس؛ أب بتنقل من مستشفى لمستشفى وهو مكسور، والطفل روحه بين إيدين ربنا، والمستشفيات الحكومية "ما في وسع"، والخاص بتطلب مبالغ خيالية ما بقدر عليها المواطن البسيط. الفرحة بالمولود بتتحول بفترة ثواني لكابوس ورحلة بهدلة ودين!
هو فعلياً في أزمة؟
الأزمة مش بأطبائنا ولا بممرضينا، كفائتهم بنرفع الراس فيها، الأزمة بضغط المستشفيات وقلة الأسرة وسوء التوزيع. الضغط كبير والحالات بتزيد، والمستشفيات مش ملحقة.
شو الحل والبديل السريع؟
سيستم موحد للغرف والشواغر: يكون في غرفة عمليات وشاشة مركزية بتعرف وين في حاضنة فاضية بكل الأردن (حكومي، خدمات، أو خاص) عشان نكسب الوقت وننقذ الولد فوراً.
تحويل فوراً على القطاع الخاص على حساب الدولة: لما ما يكون في سرير حكومي، يتغطى الولد بالخاص فوراً بدون ما يطالبوا الأهل بمبالغ بتكسر الظهر.
دعم مستشفيات المحافظات: تزويد مستشفيات الجنوب والشمال بحاضنات كافية عشان الناس ما تظطر تطلع على عمان عشان حاضنة.
معالي الوزير، إحنا بنحكي معك لأننا بنثق فيك وبحسك الوطني، وأطفالنا الخدج أمانة برقبتنا جميعاً، والحلول اللازمة ما بتتحمل تأخير!
حفظ الله الاردن والهاشمين