من أمن العقاب أساء الأدب

أحداث اليوم - كتب: محمد الحجيري

انا عشت اربع سنوات في مدينة بوسطن ، مش في ضواحيها ولا حواليها، عشت في نص المدينة و شفت مواصلاتها و شوارعها. و عندهم باص سريع.

الباص السريع عندهم باص عادي، مش قطار، بس سريع نوعاً ما لانه بكون اله خط محدد، بس برضو بيطلع من خطه احيانا و بمشي في بعض الشوارع مع باقي السيارات. و بعدين برجع لمساره. و دائما دقيق في المواعيد لانه ما يمر بالازمة !

مش متذكر ولا مرة سيارة استظرفت و لحقته في مساره. هل لانه الشعب كتير محترم و مثقف؟ هل لانه الامريكان مش نهفة زينا ؟ لانه العقاب كتير عالي و الغرامة فلكية. 

كلنا تأثرنا من تأخير و مماطلة الباص السريع.و في ناس خسرت رزقها و تسكرت محلاتها و الموضوع كان غير مقبول ابداً. بس الناس صار بدها هلأ تخرب و تفشل اكتر مما هو خربان، نفس التمرد الموجود في المراكز بالتدخين تحت شاخصة ممنوع التدخين، نفس التحدي المقيت للقانون الي بنشوفه في كل مكان، هلأ بنشوفه في السيارات الي عم تستعمل خط الباص السريع.

من أمن العقاب أساء الأدب، و هاي المشكلة الكبيرة في بلدنا