اخبار العراق
موقع كل يوم -صوت العراق
نشر بتاريخ: ٢٩ أيار ٢٠٢٢
هجرة العقول
د. حسن كاظم محمد
ألِف وَسفَه هاجَرَت مِنَّك عقول
نَاس طَيبه دارسَه كـلهه أصول
گالو الأوطان تُـبنى بالعقـول
عْراگ ثابِت صامِد يوَلِّد فُحول
***
وَرِّطـوك تْـحمَّـلِت روجِ الـبَحَـر
خَلَّصِت مِن البَحَر جوعُ وْنحول
حِچَوعَنَّك ُ بالصُحُف وِبْلا دليل
آخ لو سِألوني عَـنَّك شَردَ گـول
خبِّـروني ناس باعـوك بْـسِعِـر
لِبَحَر مَحَّد يِضْمنه بْكُل لفصول
وِلدَرُب مِن ضَاق وِنْسَدِ المَسير
طُفَح بِيكِ الْروج وِتْحوَّل سِيول
***ْ
يا عِراقي اسْمَع وِصْبُر لا تَمِـل
وِذكُر التَاريخ مِن يَومِ المَغـول
خَانَتَك حُسَّاد مِن خَلفِ الْحِدود
وْهاي غَيمه تِنقشِع يَوم وْتزول
دْريت أسباب الغُرب فُـقُـر وْظُلُم ؟
وَكو حِيتان الْبَحَر تْصول وتَجول
لِغُربَه ما تِگْدَر تشافي لَك جُرُوح
بِالگلُـب تِتْرُك أثـر ما لَه قَـبول
جَازَفَت شُبَّان وِصْلَـت لـلجُرُف
عُـبْـرَتِ الْوِديان وِجْبَال وْسِهول
إنْتَبه لي لـلحقـيـقَـه شْچَـم وَجِـه؟
حَيّرتْني لا عُرُض لا بيهه طول
الْهجْرَه دِخْلَت بِالسياسَه وِالْدَجل
بَلَد يَسمَح بلد يَرفُض لَك دخول
خَـل أنـَبهَـك عِكَس وَياّك لزَمَن
كِثْرَوِ الْوِعّاظ وَصْحَاب الْمِيول
خَلّي نِحچيهَـه بْصَراحَـه لا تْحِيـر
كِلـمَن يوَفّي اْلوَطَن لازِم يِـنول
هِـجْرَةِ الإسْلام مِـن مَكَّه بِـدَت
قـادْهَا بْهـمَّه هـاديـنَه لْـرَسـول
صفّي نيتك وِسعه وِتوكّل بَعَـد
ربَّك الخَالـق يوفُّـر لَـك حِلـول
وإلى اللقاء