ماذا يعني نقل خامنئي صلاحياته للمجلس الأعلى للحرس الثوري؟

مع تصاعد التهديدات الإسرائيلية والأمريكية باغتيال المرشد الأعلى لإيران علي خامنئي، قرر الأخير نقل صلاحياته إلى المجلس الأعلى للحرس الثوري، وهنا برزت تساؤلات عدة حول الهدف من الخطة.

يقول الباحث في الشؤون الإيرانية، محمد يوسف، عبر صفحته على فيسبوك: "المرشد الأعلى لإيران، علي خامنئي، فوض كامل صلاحياته للمجلس الأعلى للحرس الثوري واللي مش فاهم ده معناه إيه؟ معناه الآتي.

أولًا: ده مش تفويض إداري... ده تفويض سلطوي كامل، يعني الحرس الثوري بقى يقدر ياخد قرارات نووية أو يشن هجمات كبيرة، من غير ما يرجع للمرشد ولا ياخد فتوى دينية، وده تغير استراتيجي ضخم في بنية الحكم الإيراني".

يضيف: "ثانيًا: القرار بيجهّز المسرح لمرحلة ما بعد خامنئي، يعني لو حصلت عملية اغتيا.ل أو وفاة مفاجئة، القيادة مش هتتهز، الحرس الثوري هيمسك البلد مؤقتًا لحين تعيين مرشد جديد، من غير ما يحصل فراغ سلطوي، ومن غير ما تنهر السلسلة القيادية.

ثالثًا: ده معناه إن إيران خلاص دخلت مرحلة الحكم العسكري المغلف بالدين، يعني مش بس الحرس الثوري بقى الذراع الأمنية والعسكرية، لأ، بقى كمان هو الحاكم الفعلي، وده بيزود احتمالات اتخاذ قرارات متهورة أو تصعيد كبير في ملفات زي إسرائيل والبرنامج النووي".

يتابع: "رابعًا: الخطوة دي متاخدة تحت ضغط الزمن، يعني واضح إن فيه تهديدات حقيقية على حياة المرشد، أو توقعات داخلية بإن لحظة النهاية قربت، فبيتصرفوا استباقيًا عشان مفيش حد من التيار الإصلاحي يلقطها ويقلب اللعبة.

خامسًا: الرسالة للخارج – وتحديدًا لإسرائيل وأمريكا – واضحة اغتيال المرشد مش هيوقفنا، بالعكس، هيسلم السلطة لأكثر جناح راديكالي في البلد".

يضيف: "سادسًا: القرار ده بيخلي أي تصعيد عسكري من إيران بعد كده، مش مجرد رد فعل، ده ممكن يكون سياسة متفق عليها مسبقًا، وجاهزة للتنفيذ.

سابعًا: إيران دلوقتي شبه دولة عسكرية بالكامل، واللي بيتحكم فيها ناس لابسين كاكي، مش عبايات".

يختتم يوسف حديثه بالقول: "الخلاصة إن إيران بتعيد ترتيب أوراقها قبل العاصفة، والمنطقة كلها لازم تقرأ اللي حصل ده كويس، لأنه هيكون بداية مرحلة جديدة في اللعبة الكبرى اللي بتحصل حاليًا في الشرق الأوسط".

اخبار مصر على مدار الساعة