تامر أمين يوجه رسالة للشامتين في أداء الأهلي بكأس العالم للأندية

قال الإعلامي تامر أمين إن جماهير النادي الأهلي تشعر بالحزن المضاعف بعد الخسارة في كأس العالم للأندية، ليس فقط بسبب النتيجة ولكن بسبب الأداء، والتصرفات الفردية، والمستوى العام،

وقال أمين خلال تقديمه حلقة من برنامج "آخر النهار" المذاع على قناة "النهار": "أنا عارف إن احنا زعلانين، أنا هنا بتكلم عن الأهلاوية، لأن أنا هوجه كلمتين كمان شوية لغير الأهلاوية، لكن أنا عارف إن إحنا كأهلاوية زعلانين، وزعل مضاعف وكبير، مش بس عشان الخسارة، لأ، عشان حاجات كتير".

ووجه أمين رسالة حادة إلى غير الأهلاوية من "الشامتين"، متسائلًا: "إيه قصتك؟ وإيه دخلك؟ ومين نادالك؟ مين اللي اداك دعوة؟ مين اللي دخلك في القصة؟ أنا مش عارف الحقيقة الشماتة دي طعمها حلو في أوي كده؟ ممتعة يعني؟".

وتابع: "هو الأهلي ده لما بيلعب في كأس العالم للأندية بيمثل نفسه ولا بيمثل مصر؟ السخافة اللي طول الوقت موجودة.. مش بس على الأهلي، أي نادي بيلعب في أفريقيا أو غيرها يقولك بيمثل نفسه ولا مصر؟ ناس تقولك آه وناس تقولك لأ، مش قضيتي".

وواصل: "فرحان لهزمته ليه؟ طالما إن هزمته دي أنت مش هتستفيد منها بحاجة، لا ناقة لك ولا جمل فيها؟ لو الزمالك بيلعب في الكونفدرالية نفرح لو خسر؟ ليه؟ وبيراميدز كان بيلعب في دوري أبطال أفريقيا، نفرح لو خسر؟ مش قعدتوا وقت بيراميدز تقولوا لازم كلنا نقف وراه؟ لما كسب قلتوا مكسب للكرة المصرية؟ هو حلال على الآخرين وحرام على الأهلي؟".

وأوضح: "أنا ما شتمتش ولا أهنت حد، أنا بسأل أسئلة أنتوا ليه شمتانين؟ ليه فرحانين؟ ماعنديش تفسير أنا لو حد مليش علاقة بيه بيلعب في أي محفل هتمناله التوفيق أو على الأقل هبقي مش مهتم".

ووجه رسالة خاصة إلى جماهير الأهلي الحزينة: "لا تحزنوا ولا تغضبوا.. أنا عارف إن ده مش في إيدينا، بس أنا بحاول ألمّ جراحي بكلمتين أعتقد إن أنتم هتوافقوني فيهم".

اخبار مصر على مدار الساعة